Por: Marciano Ramos Moreira*
Nu staba na tenpu di rijimi di Partidu Uniku li na Kabu Verdi, na prinsipiu di dekada di oitenta. Di paizis di Áfrika, na kel tenpu, sa ta benba, manenti manenti, notisias di Golpi di Stadu. Enfin staba ton na moda Golpi di Stadu ki ti nos irmon – Giné-Bisau – rizolve sigi moda.
Txentxi ku Nunu, 2 amigu antigu (di tenpu di Skola Primariu), kontra na rua. Dja tenba txeu anu ki es ka odjaba kunpanheru kifari konbersa ku kunpanheru. Txentxi, ki staba na jetu, odja se amigu ku ar di koitadu, rizolve konbida-l pa es ba toma uns kaku na un bar pertu timenti es ta poba konbersu en dia.
Papia di li, papia di la, es ba ta soti na ses grogu. Nunu, mal alimentadu sima el staba, kabesa staba-el lebi. Di manera ki el kumesa ta bira fusku dipos di uns 2 kopinhu di grogu. Sima el ba ta fika mas txabesku, e si ki lingua ba ta bira-l mas soltu. Kantu Nunu fika mesmu moku, ti medu di Pulisia Pulitiku subi latxi:
– N ta fika kontenti di odja-bu ben di bida i ma bu ka skese di es bu amigu, Nunu di nha Branka. – kumenta Nunu, djuntu ku da se amigu Txentxi palmadinhas na onbru.
– Dios grasa, N ka ten ki kexa! Desdi Independensia, nha bida midjora so midjora.
– Independensia?! Independensia pa bo, traze bonansa, mas, pa mi, el traze dizenpregu. – lamenta Nunu.
– Ka bu dizanima, Nunu. Kontinua ta djobe ku npenhu. Un dia bu ta atxa trabadju i bu vida ta ba kaminhu. Timenti bu sta ku bida, bu ten ki luta.
– Na, trabadju e so pa kenha ki ten kunha. So pa kamaradas. Ami, so pabia mi era guarda na kaza di un Tuga ki era di PIDE i nha mudjer era kriada la tanbe, es po odju ku mi. Es txiga ti di ba rabista nha kaza.
– Es, kenha? Kuandu? – purgunta Txentxi ku odju ragaladu di kuriozidadi.
– Pokus anu dipos di Independensia. Mas, N ka konxe kes genti ki ba rabista. Dipos, era di noti… So N ta diskunfia ma e un vizinhu dimeu ki ba da ku lingua na denti.
– An?! Pamodi ki el ba rue di bo? – kontinua Txentxi, xeiu di kuriozidadi.
– Gentis ba nha kaza rabista na dia siginti di un batinbora entri nos 2 trokadu un beku entri nos 2 kaza ki es vizinhu rizolve kaba ku el pa el pode abri se kaza. Si N dexaba, el ta tapaba-mi janela di un kuartu di nha kaza ku novu paredi npena se kaza. N ragatxa pe na txon, N nega dexa-l pabia kantu el faze kaza, el atxa-m ku janela la! Nton, el amiasa-m: “Bufu di merda! Spera bu ta odja – bu janela ta fika-bu kuadradinhu, kuadradinhu, la Kadia Sivil, bu futuru kaza! Lanbedor di PIDE! Katxor di 2 pe, spera!”
– Kuze ki es faze-bu? Es atxa algun kuza mariadu dentu kaza? – purgunta Txentxi, inda mas kuriozu.
– Es ka atxa nada. Es ka faze-m nada, mas, na ta buska, es straga-m alguns mobilia dentu kaza.
– Ah! Nton, dja pasa. Ba ta djobe. Trabadju ta parse. Speransa ta more di tras! – anima-l Txentxi, djuntu ku uns palmadinha na kosta.
– Ami? Trabadju, pa N atxa, so si dadu un Golpi di Stadu!
– Golpi di Stadu?! Mos, ka bu fla un kuza di kel li! Bu prublema ka ta rizolve ku Golpi di Stadu, mas sin, ku mas dizenvolvimentu, ku mas enprezas publiku! – prutesta Txentxi.
– Nau, dja N fla-bu – e so ku un Golpi di Stadu! Oh Nhordes, nhu manda-nu un Golpi! – Nunu labanta mo ku rostu pa seu ta pidi ku devuson.
– Mas, a prupozitu, Nunu, ki kursu ki bu tra?
– Txentxi, mi, N ka faze ninhun kursu.
– Ben, sen kursu, trabadju e mas difisil. Bu txiga di kaba liseu?
– Omi, mi, N ka ba liseu. – kudi Nunu, un poku xatiadu ku purguntas di amigu.
– Nunu, nton, ti undi bu studa?
– Txentxi, ami, kantu N sai di skola, N staba na 3ª-klasi…
– Nunu, so ku 3ª-klasi nen “golpi” ka ta txiga-bu… Bo, bu meste e un surupu!
Marsianu nha Ida padri Nikulau Ferera
