Por: Marciano Ramos Moreira*
La Mérka, nos patrisius ta da nos lingua valor! La, es ta studa lingua kabuverdianu na alguns skola! Un dia na aula di lingua kabuverdianu, un profesora fla:
– Alunus, kada un di nhos ta traze 3 frazi manhan pa nu ben analiza ses sintaksi. Kada un ta studa sintaksi di kada frazi ki el inventa pa ben splika ses kondisipulu.
Un di kes alunu txomaba Txiku di Zeka. Rapazinhu tenba kuazi 11 anu di idadi. Es trabadju di kaza da-l kudadu:
– Modi ki N ta inventa 3 frazi sima mi e fraku li?! Spera N ba odja si mama ta djuda-m propi!
Kantu Txiku txiga kaza, se mai staba la kuzinha so na pripara djanta. Se mai staba priokupada pabia el atraza na pripara djanta kel dia:
– Mama, nha profesora kre pa kada alunu inventa 3 frazi pa ba ser analizadu gramatikalmenti na aula di lingua kabuverdianu manhan. Fla-m la na poku na poku 1 frazi pabia N ka sa ta konsigi inventa ninhun.
– Ba brinka! – mudjer, ki staba konsentrada na pripara kumida, riaji xatiada, sen ntende dretu kuze ki Txiku kreba.
Txiku fika kontenti – na poku 1 frazi bodona dja el ranja: ba brinka!
Animadu, Txiku ba djobe si el ta konsigiba algun ajuda di se irmon mas grandi di 13 anu di idadi i ki txomaba Txabá. Kantu Txiku txiga sala, el atxa se irmon ku odju ragaladu, konsentradu na odja un filmi di Super Omi:
– Txabá, nha profesora fla pa kada un di nos ba ku 3 frazi pa nu ba studa ses strutura, istu e, ses konstruson i enkadeamentu. Bu pode djuda-m inventa na poku 1 frazi?
– Super, Super Omi, Super! – kudi Txabá, sen presta atenson na purgunta di Txiku, ta faze sinal pa Txiku kala boka i dexa di interonpe-l.
Txiku fika inda mas animadu – dja el konsigi mas 1 frazi bunitu: Super, Super Omi, Super!
Txiku kore pa kuartu di se irma di 15 anu di idadi. Se irma txomaba Txuka. Txuka staba, kel ora, rei di sabi ta obi se muzika:
– Txuka, nha profesora fla pa kada un di nos leba 3 frazi pa nu ba studa ses sintaksi. Bu pode djuda-m inventa nen si e so 1 frazi txaskan?
– Ben ku mi, ben! – fika ta kanta Txuka, ki sa ta ripitiba letras di un kantiga di se kantor prediletu. Txuka nen ka obi konbersu di Txiku trokadu auskultador ki el teneba na obidu i pabia, tanbe, di muzika ki staba altu. El fika so na faze Txiku sinal pa sai di se kuartu i dexa-l en pas ta kurti kel kanson fixi.
Go ki Txiku fika sabi na mundu – dja el konsigi ranja ultimu frazi ki el mesteba: ben ku mi, ben!
Na dia siginti na aula di nos lingua maternu, profesora purgunta Txiku:
– Txiku, fla 1 di kes 3 frazi ki N pidi onti pa nhos inventa pa oji!
– Ba brinka! – antis profesora fitxa boka, Txiku risponde bazofu. Oji, Dios paga se mai ku ses irmon, el staba ben priparadu!
– Mas kenha ki bu pensa ma bo e?! – prutesta profesora, ki kuda ma Txiku sa ta xuxaba ku el.
– Super, Super Omi, Super! – kontinua Txiku, sabi di bida, konvensedu ma frazis ki el inventa era so xou-di-bola. Txiku ntende ma se profesora staba satisfetu ku se primeru frazi i sa ta pidiba sugundu.
– Rua!!! – furioza, profesora rabida fla-l pabia el pensa ma Txiku staba ta falta-l rispetu.
Txiku, tudu orgulhozu, sen presta atenson dretu na kuzas ki profesora sa ta flaba-el, fla se ultimu di kes 3 frazi maravilhozu ki el ranja na maskadjon:
– Ben ku mi, ben!
Marsianu nha Ida padri Nikulau Ferera
