Por: Marciano Ramos Moreira*
Era un bes, tenba un rapas di nomi Djo di nha Txika. Es mos gostaba di se grogu. Dja el staba ku mas di 30 anu di idadi. El ta moraba nun sidadi li nes 10 gronzinhu di tera ki Deus planta na meiu di Atlantiku. Djo, ti ki el staba boka na txon, el ta fazeba kada palhasada ki ses genti ta fikaba ku burgonha propi.
E si ki un dia, Djo txiga moku na porta di un bar. Moku ki el ka sa ta podeba anda. El staba ku un bolsa di plastiku transparenti trabesadu riba di onbru. Dentu di kel bolsa, el tenba 2 bolu. Djo tenta subi skada pa el entra na kel bar, el ka konsigi – ta subi un digrau ti dos, el ta ben di kadera; ta subi, ta ben pa tras sima kes kamion bedju dun bes na subida ku karga di mas. Kantu Djo odja un roda di gentis ta djobe-l ku ar di trosa, Djo komesa ta justifika:
– E es bolus pa nha fidju-matxu – Djo Júnior! Es saku di bolus sta-m ton pizadu na kosta ki N ka sa ta pode subi.
Pur fin, Djo konsigi, dipos di txeu tentativa, subi skada di kel bar. Djo kreba kunpra un kopu di grogu. Pabia el staba fusku, donu di bar disidi sirbi-l un kopu di grogu ku un banana:
– Mas, Sinhor, N ka pidi banana – N manda ben so un kopu grogu!
– Sinhor, es grogu e forti di mas. Trokadu disu ki nu ta sirbi-l senpri djuntu ku un banana o un posta txitxaru fritu o otu bafiu.
– N pidi un kopu grogu i e so kel ki N ta toma!
– Ti ki algen ki ka sta friu o ki ka sta ben alimentadu, bebe es grogu sen bafa, es grogu ta kustuma da es tipu di algen na txon. E midjor nhu bafa!
– N ka ten kabesa lebi, nau!
– Ben, si nhu obi, e konsedju. Si nhu ka obi, e konbersu. – rabida fla-l, rezignadu, donu di bar.
Djo non so toma kel kopu grogu, mas el toma, fora i torna fora otus di riba! Di manera ki kantu el ta sai di kel bar, dja el staba ku gata.
Djo txiga na primeru posti di lus, el nbrasa posti, el po ta beija posti! Donu di bar ben txoma-l atenson, pa el dexa di da skandalu frenti se bar. Djo sanha na donu di bar. I, pa kaba mata, na nves di el ba kaza, el entra na un otu bar i el toma mas grogu inda.
Kantu Djo sai di es sugundu bar, go ki txoma el staba boka na txon! Djo staba ton moku, ton moku ki el skese kal ki e kaminhu se kaza. Omi skese undi el ta mora! El txiga nun prediu ku un monti di apartamentu, el po na toka na interkomunikador:
– Sin! E kenha? – responde un mudjer di dentu dun apartamentu.
– E mi Djo di nha Txika.
– Djo di nha Txika…?! Kuze ki nhu kre?
– Nha ben li di baxu pa nha ben odja si mi e ka maridu di-nha.
Klaru, mudjer manda Djo kata piodju! Djo kalka na otus boton i ningen ka sa ta benba djobe-l. Kantu el odja ma ka sa ta da obra, el dizisti di toka na interkomunikadoris. El ba kontinua ta anda na rua, ta djobe se kaza.
El anda ti el kansa. Nton, el xinta na orela paseiu, ku tudu 2 pe dentu faixa di rodajen. Pulisia ben ta pasa. Ajentis stranha kel algen xintadu, kel ora madrugada, el so ku pe na via. Nton, un ajenti purgunta Djo:
– Omi grandi, bon noti! Anho, ki sta li nho so es ora noti!? Nhu tene algun prublema?
– Prublema?! Ami, nau! So dja N skese undi nha kaza ta fika. Dja N djobe-l tudu djobe, N ka sa ta atxa-l. Ti dja N kansa. Pur isu, dja N disidi xinta lisin ta spera-l pasa! So el ben ta pasa nha frenti lisin, N ta labanta faxi, N ta da txos, N ta kanba dentu del vupu, antis el torna ba pa lonji.
– Spera kaza nho pasa!? Modi ki kaza nho pode pasa lisin?!
– Eh! Ka fladu ma tera ta jira…?!
Agentis di Pulisia ratxa uma grasa! Djo xatia ku kel trosa, katrisa, labanta, da rinkada, ta ba ta resmunga. Dipos di anda un monti tenpu na rua ta tenta atxa se kaza, xixi fronta Djo. Staba dja altu ora di noti. Djo disidi xixi na rua. El po na djobe un posti di lus ku lanpada fundidu. Mas, txabesku sima el staba, el atxa un omi altu na rua sakedu nun kau menus iluminadu, el kuda ma era posti di lus. Djo komesa ta xixi na pe di kel omi sakedu! Omi da-l uma totisada! Djo reaji:
– Diaxi! Posti dja da-m xoki!
Marsianu nha Ida padri Nikulau Ferera
