Por: Marciano Moreira*
I ki prova ki N sa ta ben aprizenta-nhos? N sa ta ben aprizenta-nhos prova mas forti ki pode aprizentadu: intervenson sobri statutu konstitusional di lingua maternu kabuverdianu ki porta-vos di Bankada Parlamentar di PAICV na Seson di Asenbleia Nasional pa rivizon di Konstituison di 1999, faze na inisiu di diskuson sobri es rivizon na dia 19-07-1999.
N sa ta papia di intervenson di enton Diputadu Nasional pa PAICV, Dr. Eutrópio Lima da Cruz. Leitor pode konfiri es intervenson na pajinas 19 a 21 di Ata di Seson di Asenbleia Nasional di dia 19-07-1999, enbora extratu di es intervenson ki N sa ta ben transkreve, sta na pajina 20. Ale kuze ki porta-vos di PAICV fla:
“No que diz respeito à língua cabo-verdiana, pensa o Grupo parlamentar do PAICV que se deva ir, para além da mera promoção de contribuições, para a oficialização da língua materna cabo-verdiana em paridade com a língua portuguesa, para se passar à sua incondicional e expressa oficialização em pé de igualdade com a língua portuguesa, sem qualquer espécie de subalternização hierárquica.” (sic) (fin di sitason) Fonti: https://tinyurl.com/y7m3s2kl
Sima nu odja na anterioris ensaiu dimeu publikadu risentimenti nes benditu jornal, MpD ta difendeba (maxime atraves di pertinentis intervenson di se riprizentanti legal, enton Prizidenti di MpD i Primeru-Ministru, Dr. Carlos Veiga na Seson di Asenbleia Nasional di dias 19 i 20 di julhu di 1999 pa rivizon konstitusional di 1999) pa nos lingua biradu lingua ofisial en konstruson, istu e, pa nu fika ku 2 lingua ofisial, sendu un lingua ofisial plenu (purtuges) i kel otu lingua ofisial en konstruson (kabuverdianu).
Oji, dja nu odja ma PAICV ta difendeba, akuandu di rivizon konstitusional di 1999, paridadi entri lingua purtuges i lingua kabuverdianu, istu e, pa nu fika ku 2 lingua ofisial plenu – kabuverdianu i purtuges.
Na altura, MpD tenba mas di 2/3 di Diputadus Nasional, istu e, el podeba altera Konstituison sen akordu di PAICV. Non obstanti, enton lider di MpD, Dr. Carlos Veiga, manifesta abertura di MpD pa nigosia ku PAICV soluson konsensual sobri statutu konstitusional di lingua maternu kabuverdianu. Trokadu kel li, e inpurtanti sabe kuze ki kada partidu ta difendeba na altura.
Na altura, nu tenba 3 partidu riprizentadu na Asenbleia Nasional (MpD, PAICV i PCD), mas PCD tenba so 1 Diputadu Nasional (Dr. Eurico Correia Monteiro).
Purtantu, si MpD kreba pa nos lingua biradu lingua ofisial en konstruson i PAICV kreba pa nos lingua biradu lingua ofisial plenu, ka ten lojika algen ben ku “N ta atxa” pa inventa oji ma, atraves di nigosiason, MpD ku PAICV txiga akordu di ka atribui nos lingua ninhun statutu, pa ka atribui-l nen statutu di lingua ofisial en konstruson nen statutu di lingua ofisial plenu. Ka ten sentidu algen ben alega ma MpD kreba 50% di ofisializason i PAICV kreba 100% i ma, atraves di nigosiason, es akorda na atribui nos lingua 0% di ofisializason.
Konkluindu, inimigus di nos liberdadi linguistiku ka pode ben ku “tioria” ma uniku lingua ofisial e purtuges i, ipso facto, pa es ben tenta kontinua ta proibi uzu di nos lingua, sima sklavajistas ku kolonialistas faze li nes txon duranti serka di 500 anu di nos oprison.
*Marsianu nha Ida padri Nikulau Ferera
