Por: Marciano Morreira
Era un bes, un familia ta moraba na primeru andar di un prediu. Na kel familia, tenba mai ku 2 fidju matxu – un di 4 anu i kel otu di 1.
Un palmanhan, es staba so es 3 dentu apartamentu. Txiga ora 15ba kunpra pon. Enpregada staba na se dia di folga. Pabia padaria ta fikaba pertu, mai vira pa fidju di 4 anu, purgunta-l:
– Djonsa, N pode dexa-nhos nhos so pa N ba zas lasinsin kunpra pon, pa N ben faxi?
Djonsa (ki staba na un brinkadera sabi ku se irmon mas pikinoti) risponde-l:
– Sin, mama. Bu pode bai.
Mai, un poku priokupada, tenta sertifika:
– Mas, Djonsa, bu ten serteza ma bu ta fika-m ku mininu dretu?
Djonsa (bazofu pabia se mai sa ta da-l risponsabilidadi) konfirma ku kunfiansa na vos:
– Mama, N ka ta dadji nel, nau!
Mai, di es bes menus priokupada, fla-l:
– Ka nhos faze kabesa rixu! N ta bai ku un pe, N ta ben ku kel otu.
Djonsa, ku se mania di spertu, ñuli se mai i prutesta ku ar di xuxanti:
– Eh! Mama, bu pensa ma mi e algun bakan?! Bu kre ngana-m ma bu sa ta ba kore so ku 1 pe?!
– Eh! Nha fidju, kel la e manera di papia – ti ki N fla-bu «N ta bai ku un pe, N ta ben ku kel otu.», N kre fla-bu: ma N ta bai faxi, N ta ben; ma N ka ta dura; ma N ta ben gosi li. Dja bu ntende, go?
– Na! Sikadjar bu kre da-m pa tolu. Manhan, N ta purgunta tia Txutxa la Jardin kuze ki signifika «N ta bai ku un pe, N ta ben ku kel otu.»
– Si bu ta kunfia na bu prufesora mas di ki na mi, sta dretu: purgunta-l. Ben. Nton, N pode dexa-bu toma konta di Txiku? Bu ka ta dexa nada buli-l?
– Ka dja N fla-bu ma N ka ta dadji nel?! Bai ku un pe, ben ku kel otu! – Djonsa fla se mai, ku se karinha di gaiatu.
Mai bai me. Ku xintidu kansadu, el bai na karera. Antis xuxu sfrega odju, dja el benba dja. Kantu el txiga na porton di prediu, el da konta ma, na kel fadiga di bai rapidu pa el ben, el skese txabi di porton dentu apartamentu. Pa konplika, interkumunikador ka staba ta abri porton na kel epuka. Nton, priokupada, atraves di interkumunikador, mai txoma fidju mas bedju:
– Djonsa, N skese txabi di porton dentu nha bolsa ki sta la dentu kaza. Po Txiku na bersu, bu ben abri-m porton.
Metadi superior di porton era di vidru – kel la ta pirmitiba un pesoa di pa fora di prediu, odja algen ta dixi na skada di 1º andar pa res-di-txon. Dipos di algun tenpu, mai spreta, el odja Djonsa ku Txiku lapidu na petu ta dixi skada! Mininu staba-el ton pizadu ki, pa el dixi kada digrau, el tenba ki sumara i fitxa koraji. Na ta dixi, el staba ta katrisa ku Txiku na petu, ta nderia, ka ta kai. Txiku staba prindadu na se irmon mas bedju, na diskontra, odju ragaladu, ta odja pa un ladu i pa otu, ku ses pezinhu ta langilangi. Prigu di Djonsa kai ku mininu era rei di grandi! Nton, mai grita ku tudu forsa:
– Djonsa, po mininu na txon! Po-l na txon!
Djonsa po Txiku na txon i fika ta odja tan pa se mai, ku ar di algen intrigadu. Nton, se mai kontinua, di es bes un poku aliviada, nun vos firmi:
– Dexa-l la na txon, bu ben faxi abri-m porton!
Djonsa faze sima el mandadu. Mai entra ta kore numa forsa pa ba pega Txiku antis di el sai ku dixi skada. Kantu mai dja teneba Txiku na brasu, mai da un folgu i, ku korpu inda ta treme, el volta pa Djonsa pa purgunta-l:
– Mas, Djonsa, N ka flaba-bo pa bu po mininu dentu-l bersu, pa bu ben abri-m porton!?
Djonsa, ku ar di algen grandi, po ses 2 mon na koxa i ñuli se mai i, nun ton di reprovason, el kudi:
– N ka po-l na bersu, nau. Si N poba-el, el al kaiba di bersu!
Marsianu nha Ida padri Nikulau Ferera
