Por: Marciano Moreira
Era un bes, tenba un sinhor di nomi Txiku nha Pontxa. Es Txiku tenba un papagaiu. Es papagaiu era konxedu pa se atrevimentu i falta di rispetu. Nomi di es papagaiu era Txibita Junior.
Alias, es nomi (Txibita Junior) pega na redondeza pabia tenba un mos ki gostaba di papia di pulitika i el txomaba Txibita. I kel papagaiu tanbe manenti ta poba na koba dirijentis pulitiku. Nton, gentis di zona fika ta txoma es papagaiu Txibita Junior.
Pa izenplu, dipos di un ileison undi partidu di kurason di se donu perde, papagaiu Txibita Junior sai na koba prizidenti di partidu dirotadu. Mas, se donu ka staba ku paxenxa kel dia. Txiku nha Pontxa panha papagaiu po la na rua, di noti i, pa kaba mata, dentu txuba ku uma friu:
– Bai, ba faze pulitika la na rua! N sta fartu di traidoris sima bo. Es ta parse un monti na kumisiu, dipos es ka ta ba vota. Si bo e pulitiku i kontra nha partidu, ba faze pulitika la na rua!
Alguns ora mas tardi, papagaiu staba inda dentu kel txuba ku friu. Nton, ben ta pasa un pesoa tudu modjadu i ku tantu friu ki el sa ta tremeba sima bara berdi:
– Eh!? Abo tanbe e pulitiku? – purgunta papagaiu.
Mas, papagaiu Txibita Junior ka ta fikaba na se lugar. E asi ki txiga un epuka ki da-l na kabesa di komesa ta koba un vizinha di Txiku nha Pontxa:
– Oh Txuka puta, ben li! – po na fla papagaiu Txibita Junior senpri ki es sinhora Txuka ta pasaba frenti del papagaiu.
Es papagaiu gostaba di fika na varanda di kaza di Txiku nha Pontxa ta da fe. Kada bes ki mudjer pasa se frenti, papagaiu ta txomaba mudjer di genti puta i ta fika ta ripiti es palavra ti ki mudjer perde-l di vista. Papagaiu ta flaba puta rixu ki otus pesoa na rua ta obiba. Mudjer komesa ta fika xatiadu ku papagaiu Txibita Junior. Un dia, kantu mudjer odja ma papagaiu ka sa ta largaba di kel malkriason, el dizanima, el ba da kexa na donu di papagaiu:
– Kunpadri Txiku, boa-tardi! Ta parse piada, mas papagaiu di-nho sa ta da-m kabu di paxenxa. Kunpadri, so N pasa se frenti baxu varanda di-nho, el ta txoma-m nomi fedi. N sa ta fika ku burgonha di gentis nes rua. N sta kuazi ta perde kabesa. Si N perde kabesa, N ta foga-l ti el koka!
– Ka nha fla-m!? Es papagaiu, tudu palavron ki el obi mininus ta fla, el ta ripiti. Dja julgadu torna julgadu, el txoma papagaiu… Mas, kumadri Txuka, ki nomi fedi ki el sa ta fla-nha?
– El sa ta txoma-m puta. I dipos, gentis ta fika ta djobe-m diskunfiadu… Onti, kel linguarada di nha Ana Txontxa purgunta-m pamodi ki, ku tudu mudjer ki ten nes rua li, so mi ki papagaiu Txibita sa ta txoma puta? Nhu sa ta imajina!? Di li poku tenpu, tudu algen ta fika ta rue-m nes kabu li…
– Nha spera, N ta konpo kel papagaiu salbaxi la korpu! I ben konpodu!
Txiku labanta, ba kuzinha, pega papagaiu Txibita Junior, traze sala:
– Papagaiu, pamodi bu sa txoma kumadri Txuka puta? Fla-m li!
Papagaiu Txibita fika ketu, ta sukundi kabesa baxu aza. Nton, Txiku leba-l kintal i po-l dentu di un bidon ku oliu kemadu. Papagaiu Txibita fika pretu. So se kabesa, Txiku ka mete na oliu:
– Kel li e pa bu prende rispeta gentis grandi! – Txiku fla-l, ngisadu si.
Na dia siginti, nha Txuka pasa frenti varanda di Txiku. Papagaiu staba la ta da fe, mas e fika kaladu. Nha Txuka pasa mas uns 3 bes, mas papagaiu kontinua mudu sen da nen un piu:
– An! Atrevidu! Nton, sinhor papagaiu Txibita Junior, nhu ka sa ta koba-m mas? – nha Txuka dizafia koitadinhu di papagaiu.
– N ka ta papia ku bo pabia N sta di fatu pretu finu! – risponde papagaiu.
– An! Ti ki bu sta di fatu, bu ta perde lingua? – trosa Txuka.
– Ti ki N sta di fatu finu, N ka ta papia ku kualker un!
*Marsianu nha Ida padri Nikulau Ferera
