Por: Marciano Moreira
Staba pa ben un diluviu! Staba pa ben txuba bedju sen tenpu kaba. Agu sa ta benba toma tudu rubera pa subi ti spadja na barsis, gadanha na laderas ti sai txadas, soti riba ti kubri kutelus. Agu sen manha ta kanba mar manenti manenti. Agu en barda, pa intxi tudu kabu ti tapa montanhas. Tera interu staba pa ben fika baxu di agu.
Pa kriaturas di Nhordes ka kaba na tera, Deus da patriarka Noe ordi pa faze kel famozu Arka di Noe. Dios mostra Noe tintin pa tintin modi ki el debe faze kel arka: spesii i grosura di madera ki Noe debe uza pa faze-l, kuze ki el debe po na juntas, ratxas i gretas di madera pa ka dexa agu entra, formatu i tamanhu di arka, sistemas di iluminason i di ventilason, etc.
Arka di Noe era un kaxa ton grandi, ton grandi ki Noe ku se familia (inkluindu mudjeris di ses fidjus) ten serka di 40 anu ta faze-l. Arka debeba ten serka di 133,5 metru di konprimentu, 22,3 metru di largura i 13,4 metru di altura. Es arka ka ta sirbiba pa viaja sima un barku – nun direson ku rumu trasadu. Inportanti era boia pa kriaturas dentu del ka foga.
Dios fla pa po dentu di Arka, fora Noe ku se familia, animals di tudu spesii, eseptu kes ki ta viveba dentu di agu. Mas, pabia ten un monti di kastas di animals, pa kebe tudu na kel arka, so podeba podu 1 kazal di kada tipu di kes animal ki ka ta viveba na agu.
Mesmu ku apenas 1 kazal di kada jeneru di animals terestri, Arka di Noe fika xeiu ti boka di animals ki ka tenba kabu po pe. Pa arka ka ba fundu, patriarka Noe – kapiton di arka – disidi sapa penis di kada animal matxu, pa ivita ki es baba sai ku ranja fidjus dentu di arka:
– Oh animals di Nhordes, nhos obi-m! Sima nhos sa ta odja, arka ka ta leba mas pezu! Pa nu ka ba fundu fepu, nu ten ki faze sakrifisiu di ka brinka mama ku papa li di dentu timenti diluviu ka pasa. Pabia disu, N ta korta nhos mandukus, N ta guarda-s, ti ki es butuperiu pasa, N ta torna da-nhos-es di volta. Ka nhos dizanima – Dios sta ku nos! – fla kapiton Noe, ku magua na vos.
Diluviu ben me! Txuba bedju ki ka ta kaba. Era txuba bedju ki bu ta pensa sa ta bazada agu ku un monti di baldis sen konta. Txuba po na txobe un pregu ba, dia ku noti, sen para. Agu toma tudu rubera, subi ti spadja na barsis, gadanha na laderas ti sai txadas, soti riba ti kubri kutelus. Agu sen manha ta kanba mar manenti manenti. Agu en barda ki intxi tudu kabu ti tapa montanhas. Tera interu fika baxu di agu.
Nton, Arka di Noe komesa boia. Boia duranti un monti di tenpu ti ki diluviu pasa, 5 mes dipos di se inisiu. Agu ba ta baxa poku poku ti ki pikus di kes montanha mas altu komesa ta parse. Arka di Noe ba nkadja na Monti Ararati – un monti ki ta fika na kel sera ki ta dividi oji Turkia ku Arménia. Dipos, es komesa ta odja otus monti. Mas tardi parse kutelus, txadas i, na fin, barsis i ruberas.
5 mes i 10 dia dipos di Arka nkadja, patriarka Noe manda un avi bua pa ba sertifika ma animals podeba sai di Arka di Noe pa ba, di novu, kanpia txadas berdi, sen kore prigu. Avi volta pa da kel noba sabi:
– Patriarka, kabus dja torna bira sima era antis di diluviu!
Nton, portas di Arka abri pa animals sai. A sigir, sima kapiton Noe prometeba, el komesa da di volta pa kada animal matxu se bibixu.
Patriarka Noe staba ta pega bixotis un a un, ta labanta na altura, ta purgunta:
– Kel li e di kenha?
Animals, matxus ku femias, tudu staba kontenti! Tudu ketu, ku atenson, pa ka fadja. Abrenunsiu!!! Imajina, fika sen po di pilon?! Si un animal matxu sorna arma nsoda si, se kunpanhera ta konko-l ku uma forsa, so labantadu se biroti, ta segreda-l dentu di obidu pa el kudi faxi. Animals staba so na risponde, kada un na se bes:
– E dimeu!!! Da-m! Da-m faxi, di favor. Forti N tene sodadi del, patriarka Noe.
– Patriarka, el ten razon! E disel. N konxe se tonton. N sa ta sunhaba ku el es noti ki manxe oji! Nhu da-l-el faxi, di zimola. – ta raforsa se kunpanhera, ku odju ragaladu, ta salta, ta sana, uns ku mo, otus ku aza i otus inda ku pata di dianti, kada un ku kel ki Dios da-l.
Devolve, devolve ti te, patriarka Noe pega numa santa maria di lagilagi:
– Kel li e di kenha? – kapiton Noe purgunta.
Era penis di buru. Kantu buru odja kes otu animal ta trosa pabia se nobegu e uma tamanhu, buru fika ku burgonha di fla ma bibixu era disel. Nton, buru fika kaladu.
Galu inda staba ta spera pa el devolvedu se biroti. Galinha fika enkantada ku kel uma bixoti. Kantu ningen ka fla ma kel po di pilon era disel, galinha fika mas ardigada inda. El ba si, da galu ku onbru uns 2 bes, dipos el fla galu, baxinhu, na obidu:
– Fla ma e di-bo! Fla ma e di-bo!
Sapatinha ribera riba, sapatinha ribera baxu, kenha ki sabe mas, konta midjor!
*Marsianu nha Ida padri Nikulau Ferera
