Por: Marciano Moreira*
Era un bes, tenba un maridu ku un mudjer, Ze ku Txutxa. Es staba na ses 20 i tal anu di idadi i es tenba inda so un fidju matxu, ki dja entraba na 9 mes di idadi.
Mai di Txutxa kazaba ku un Merkanu bedju kotikoti, ki dexa-l viuva inda noba, na flor di idadi. Mai di Txutxa txomaba nha Maria. El staba inda jeitoza, enbora dja el staba na ses 40 i tal anu di idadi ta bai. Es nha Maria, ku tenpu, fika apaixonada pa se jenru, Ze. Nha Maria fika kada bes mas dodu na se jenru, ki dja el ka sabeba kuze ki el ta faze. Nton, nha Maria sai ku tranka gera ku se jenru, pa el odja si se jenru ta saiba-el di kabesa. Nha Maria po mal ku se jenru. Mas, tudu pa sisi – sensia na Ze txiga un pontu ki nha Maria fika ku medu di futi, perde kontrolu, bua riba Ze.
Nun fin di simana di noti, Ze ba un festa aniversariu di un kunpadri, di nomi Kaká. Fidju di Ze ku Txutxa txomaba Txeka i asves el ta saiba ku txora seka di noti. Prisizamenti kel noti Txeka po na txora seka, ka ta dexa Txutxa durmi. Nton, nha Maria ben kuartu di kazal i fla se fidja:
-Dexa-m li ku Txeka na bersu, bu bai fika na nha kuartu. N ta fitxa porta, bu ta fitxa porta. Asin, bu ta tra un soneka.
Txutxa, kontenti da silva, riaji:
-N ten un mai di oru! Deus paga-bu, mama!
Txeka txora mimu, txora ti kansa, mas dona ka karaga-l. Kantu Txeka dizanima di txora, el fika ta jeme, ta jeme ti ki el pasa ta rasmunga, rasmunga, ti ki el bira ta solusa, so solusa. Solusa di li, solusa di la, Txeka skese di txoru i kai na sonu. Di manera ki kantu jenru txiga altas-ora di madrugada, so sogra ki staba kordadu dentu kel kaza, korpu kenti, so na pensa na se jenru ta kore-l mon pa tudu kabu. Ze staba moku. El entra kuartu sen sende lus, ta nderia ka ta kai, ta papia txeu, ta pidi diskulpa pa se mudjer pabia el dura ku ben, ta konta partis:
-Nha fofa ki N kre txeu! Txeu sima mar! Kulpa e di kunpadri Kaká ki ka dexa-m ben. Minina, nha kunpadri Kaká e brajeru! N fla-l ma bu ta xatia si N txiga tardi. Nton, kunpadri Kaká fla-m pa N spera manxe, ma asin N ka ta da topada na kaminhu i ma, si bu purgunta-m pamodi ki N txiga “tardi”, pa N risponde-bu ma sta inda sedu palmanhan, ma N txiga “sedu”…
Mudjer kontinua mudu sen da un piu dentu sukuru. Nton, Ze dizisti di konta piada, el deta i, sen perde tenpu, el salta pa riba di mudjer. Mudjer ka fla nen po nen pedra – el dexa matxu nobu kanpia txada! Kantu es txiga gloria, fria korpu, Ze labanta, ba kuzinha toma un kopu di agu. Kantu el txiga kuzinha, el da ku se mudjer ta bebe agu! Nton, Ze spanta:
-Mas, Txutxa, modi ki bu sta li, si N dexa-bu na kuartu?
Sangi subi Txutxa kantu el odja Ze rodidjadu na lansol:
-Kuze? Mas, e nha mai ki sta detadu la na nos kuartu! Pamodi bu sta rodidjadu na lansol?
Ze tuntunhi. Txutxa ngosta naris na lansol i, xatiada, el purgunta:
-Manba…? Ka bu fla-m propi!
-Nton, e bu mai!? Pamodi ningen ka fla-m? Koitadu mi, nha txabesku, N ka ten kulpa si kontise… – Ze fika xoloi, nkondje onbru, leba se 2 mon pa kabesa na sinal di afronta marmi.
Txutxa da un karera pa kuartu di kazal. El sende lus, el da ku se mai riba kama nunpriti, sima kantu se mai pari-l:
-Mas, mama, bo dentu es sukuru sima breu, bu ka fla nha maridu, moku sima el sta la, ma e bo ki sta detadu riba nha kama?
Nha Maria, na diskontra, ku rostu di algen ki kaba di txiga di paraizu, ñuli-l i risponde ku un otu purgunta:
-Bu ka sabe ma N ka ta papia ku el?! 000000000000000000000
*Marsianu nha Ida padri Nikulau Ferera
(Publicado na edição semanal do A NAÇÃO nº 611, de 16 de Maio de 2019)
