Por: Marciano Moreira*
Kamara Munisipal di Rubera Grandi di Santiagu da-m es distinson pa okazion di komemorason di Dia di rispetivu munisipiu, 31-01-2019.
Na “DIPLOMA” ki Prizidenti di Asenbleia Munisipal, Injinheru José Luís Xavier Gomes, ntrega-m, sta:
“Pa rikonhese se apoiu en prol di kauza di Sidadi-Velha, Kamara Munisipal di Rubera [Grandi di] Santiagu ta nomia, ku gratidon, Marciano Ramos Moreira Sidadon di Meritu di Sidadi-Velha.
Sidadi di Santiagu di Kabu Verdi (Sidadi-Velha), 31 di janeru di 2019.
Prizidenti di Kamara Munisipal (sinatura di Dr. Manuel Monteiro de Pina)” i karinbu.
Na se perfil na facebook, sta un post di Kamara Munisipal di Rubera Grandi di Santiagu di 21H11 di dia 31-01-2019, ki ta fla nomiadamenti:
“Omenajiadus na Seson Soleni di Komemorason di Dia di Munisipiu di Rubera Grandi di Santiagu:
(…)
Dr. Marciano Moreira, Fidju di Sidadi-Velha i Difensor di Lingua Kriolu, pa se Exsepsional Perkursu Pesual, Literariu i Akademiku, [dizignadamenti] na ta prumove lingua i kultura kriolus. (…)” (fonti: https://tinyurl.com/yyvsow76)
“CABO VERDE magazine” – prugrama notisiozu di TCV i na nos lingua – transmiti, na se idison di 30-01-2019, un entrivista ku Prizidenti di Kamara Munisipal di Rubera Grandi di Santiagu, undi es Prizidenti fla nomiadamenti:
“Duranti Seson Soleni, nu ta rikonhese alguns personalidadi ki faze algu pa nos munisipiu. Pa izenplu, (…) ten alguns pesoa ligadu a kultura, sima Marsianu di Txika (Marciano Moreira), di nos rubera i fidju di Sidadi-Velha, ki ten stadu ta difende kriolu ku algun intensidadi, trazendu kultura pa nos Sidadi. Nu sa ta da-l distinson di Sidadon di Meritu, pabia el ten difendidu, li na Kabu Verdi, kriolu ku meritu.” (fonti: a partir di 20 minutu i 25 sigundu di es vidiu: https://tinyurl.com/y3lbh6rc)
N resebe es noba atraves di karta N/Ref. Nº 054/GP/2019 i sinadu pa Prizidenti di Kamara Munisipal di Rubera Grandi di Santiagu, undi sta nomiadamenti:
“Kamara Munisipal di Rubera Grandi di Santiagu, pa rikonhese notavel kontributu di-nho pa Prezervason i Valorizason di Lingua Kriolu, disidi atribui-nho, na kualidadi di fidju di Sidadi Bersu di Nason, distinson di Sidadon di Meritu** di Sidadi-Velha.”
Na 2007, N da konta ma era nisisariu difende lingua maternu kabuverdianu i se alfabetu ofisial, un alfabetu ki ta ben liberta nos disendentis di sufrimentu di dikora ortografia di palavra.
Ku es objetivus i di grasa:
-di 4º trimestri di 2007 ti gosi, N sa ta mante un kuluna na jornal inpresu “A Nação”, ku periodisidadi simanal na primerus 6 anu i kinzenal na anus subsikuenti;
-di 1º trimestri di 2009 ti 3º trimestri di 2010, N mante un kuluna simanal na jornal inpresu “Expresso das Ilhas”;
-di abril di 2017 ti gosi, N sa ta mante un rubrika simanal (ku transmison tudu kuarta-fera 17H00 i intituladu “lingua maternu”) na prugrama notisiozu di TCV “CABO VERDE magazine”;
-di janeru di 2018 ti gosi, N sa ta mante un rubrika simanal (atualmenti ku transmison tudu kuarta-fera 21H10 i intituladu “lingua maternu”) na prugrama kultural di RCV “Origens”;
-alguns artigu dimeu previamenti publikadu na jornais supra republikadu na jornais dijital, sima “Liberal”, “FORCV”, “Expresso das Ilhas”, “A Semana” i ultimamenti sa ta republikadu na jornal dijital “A Nação”.
N ta agradese es orgons di kumunikason sosial ki da-m o sa ta da-m es oportunidadi di kontribui! N ta agradese Kamara Munisipal pa es distinson i N ta spera ma nu ta kontinua djuntu ta difende lingua ki nase nes Sidadi Bersu di Nason!
*Marsianu nha Ida padri Nikulau Ferera
(www.facebook.com/marcianormoreira)
** Pur lapsu, es po nes karta: “Sidadon di Meritu” na asuntu i “Sidadon Onorariu” na testu.
