Por: Marciano Moreira*
Un amiga dimeu odja António Simões na txon ta spera anbulansia. N ta dexa leitoris ku alguns informason adisional ki es amiga da-m, vistu pertinentis dizinformason.
Ifetivamenti, alguns meiu di kumunikason sosial ten stadu ta spadja alguns informason ki ka ta koresponde a verdadi a rispeitu di es kasubodi, dizignadamenti sobri lokal undi kontese es kasubodi. Pabia N ta akredita na nha fonti i nha fonti tistimunha ku ses 2 odju alguns faktu pertinenti, N ta ben partilha es faktus ku nhas leitor.
António Simões da Costa dadu kasubodi frenti di Beramar Grill / Beramar Hotel. Beramar Grill- / Beramar Hotel ta fika na extremu sul di Txan d’Areia, djuntu di rotunda ki ta dividi tranzitu ki ta ba di Plateau entri kel tranzitu ki ta subi prinsipal ranpa di Txada Santantoni i kel tranzitu ki ta ba Prainha. Via ki ta ba Prainha, ta kontinua ti Palmareju i, di Palmareju, ti Sidadela. N sa ta papia di ranpa di Txada Santantoni ki ba tirmina na Restaurante O Poeta, ranpa ki e, rialmenti, prinsipal asesu pa Txada Santantoni. Es rotunda ta fika frenti di entrada prinsipal di staleirus di obras di konpleksu turistiku di Djeu di Santa Maria.
Konven sklarese kes ki ka konxe sidadi di Praia dretu, ma Txada Santantoni ku Palmareju e kes 2 prinsipal bairu di Sidadi di Praia di pontu di vista populasional. Plateau e sentru di Sidadi di Praia, undi sta grandi parti di lojas i ripartisons di Stadu.
Simões dadu kasubodi banda 13H00, istu e, di dia ku 7 ora sol. El dadu kasubodi na ultimu sabadu antis di fin anu, istu e, na dia 29 di dizenbru di 2018. Na mumentu ki Praiensis sa ta ultimaba konpras di fin di anu. Purtantu, di pontu di vista di muvimentu di karus, ex-jugador di Benfica dadu kasubodi na un di kes zona i mumentu mas muvimentadu di sidadi di Praia – na enkruzilhada di kes 3 prinsipal bairu di sidadi di Praia (Txada Santantoni, Palmareju i Plateau).
António Simões nase na dia 14 di dizenbru di 1943, istu e, el dadu kasubodi na mes ki el konpleta 75 anu di idadi. Na kel mumentu di kasubodi, el staba djuntu ku se mudjer. Pabia ka sabeda kas ferimentu ki el panha, tranziuntis ka mexe nel na txon, mas dilijensia pa anbulansia ben sokore-l. Istu e, el fika na txon duranti algun tenpu. I tranziuntis faze dretu, pois ben diskubridu mas tardi ma António Simões tevi un fratura na anka…
Na kel rotunda undi Simões dadu kasubodi, ten un kamara di vijilansia. Purtantu, Simões dadu kasubodi serka di 50 metru di un di kes serka di 600 kamara di vijilansia resentimenti instaladu na nos sidadi na anbitu di prujetu sidadi suguru.
I Pulisia Nasional konsigi kasa kes 2 kasubodista na pokus ora i konsigi, outrusin, rekupera kes kuza ki es 2 kasubodista roba.
Nu sta peranti un verdadi makabru: es 2 kasubodista ka kustuma inda ku es sistema di vidiu vijilansia instaladu li na Praia di Santa Maria di Vitoria; i, nes kazubodi, es dexa Kabuverdianus tristi i envergonhadu pa sisi.
Deus grasa Simões sa ta rekupera dretu, dipos di operason ki el fazedu na anka na dia 31 di dizenbru di 2018 la Purtugal!
Simões, un strela di futibol, ki kontribui, djuntu ku lendariu Eusébio, pa Purtugal alkansa 3º lugar na Mundial di Futibol di Inglatera na 1966! Na kel Kopa undi Simões mete Brazil golu ku rei di bola – Pelé – na seleson! Enfin, Simões, algen ki dja da amantis di disportu-rei txeu alegria! Kasubodistas debeba ama-l!
Simões, nu ta pidi-bu diskulpa! Nos solidariedadi! Forsa!
*Marsianu nha Ida padri Nikulau Ferera
www.facebook.com/marcianormoreira
