Por: Marciano Moreira*
Kel la e opinion di Kardial Don Arlindo Furtado sobri atual Ministra di Idukason, opinion konferivel na entrivista ki Kardial da TCV na 18-12-2018 na anbitu di prugrama “Ponto Por Ponto” (konferi es vidiu: https://tinyurl.com/ybenxjge a partir di 25 minutu i 20 sigundu). Ale pertinentis extratu di palavras di Kardial:
“Sa ta falta inplimenta alguns aspetu di akordu juridiku ku Santa Se – Konkordata. Es inplimentason ten ki ser priparadu.
Nu ten 2 o 3 aria fundamental di Konkordata ki ten ki inplimentadu. Un di es aria e intruduson di disiplina di rilijion i mural na skolas.
Na pratika, Guvernu sa ta tuntunhi na intruduson di disiplina di rilijion i mural na skolas. Fora kel la, Guvernu di Kabu Verdi stevi sen enbaixador djuntu di Santa Se duranti un sertu tenpu ultimamenti. Es vaziu ka debe ter djudadu na atxa kaminhu pa un ifetivu inplimentason di es aria fundamental.
Mas, Guvernu di Kabu Verdi dja nomia novu enbaixador djuntu di Santa Se. N ta spera ma es nomiason ta ben da prusesu di intruduson di disiplina di rilijion i mural na skolas un novu inpulsu. Tantu mas ki es novu enbaixador e un jurista sprienti.
N ta spera ma es novu enbaixador ta djuda Guvernu na 2 aspetu fundamental. Primeru, enkuantu jurista, N ta spera ma el ta djuda Guvernu ntende alkansi di es Konkordata – un akordu internasional entri Kabu Verdi i Santa Se. Sigundu, enkuantu Kabuverdianu, N ta spera ma el ta djuda Ministeriu di Idukason ntende ma valoris ki disiplina di rilijion i mural ta prumove na skolas e valoris kabuverdianu, nos valoris, valoris di nos sosiedadi.
Ifetivamenti, atual Primeru-Ministru ta da kada Ministru kuazi plenus puder. E di kada Ministru ki ta dipende kuazi tudu ki ta kontese na rispetivu Ministeriu.
Nes mumentu, nu ten un Ministra ki ka e Kabuverdiana di orijen, ki ka e Kabuverdiana di jema. Pur isu, el pode ten algun difikuldadi na ntende sertus kuza, el pode ten difikuldadi na ten sensibilidadi pa ntende alguns kuza.
N ta spera ma atual enbaixador di Kabu Verdi djuntu di Santa Se, sendu el un Kabuverdianu, el ta djuda Ministra di Idukason ntende ma, na fundu, ka e valoris di Igreja Katoliku ki nu kre inpo atraves di disiplina di rilijion i mural, mas sin, valoris kabuverdianus.
Disiplina di rilijion i mural na skolas ta ba kontribui pa prezerva valoris kabuverdianu, ki atualmenti sa ta sofre txeu eruzon. Es sforsu pa riaviva valoris kabuverdianu ta djuda kada sidadon faze un leitura mas objetivu di kuzas ki sa ta pasa na nos sosiedadi atualmenti.
I faktu di ta izisti otus rilijion fora rilijion katoliku ka e inpiditivu di intruduson di disiplina di rilijion i mural na skolas, pabia es disiplina ta ba prumove valoris konsentaniu ku direitus umanu, ta ba prumove valoris kriston. Valoris kriston ki ta difende ma kada prosimu e un irmon o un irma. Purtantu, prumuson di es valoris ka ta prijudika sosiedadi, mas sin, apenas ta djuda sosiedadi.
Kristu ta nxina-nu ma nu debe trata kada algen sima nu debe trata un irmon o un irma. Ma nu debe trata tudu algen ku karinhu, ku amor, ku rispeitu, ku spiritu di solidariedadi. Nun palavra, ku fraternidadi! I un dia nu ta presta Deus konta pa forma modi nu trata nos prosimus. Isu e, fundamentalmenti, valoris umanu!”
*Marsianu nha Ida padri Nikulau Ferera
www.facebook.com/marcianormoreira
