Por: Marciano Moreira*
Na anus 60 di sekulu 20, grandi parti di Kabuverdianus ki ta nbarkaba pa Fransa, ta txigaba la sen sabe lingua franses. Na kel tenpu, na Fransa inda tenba pokus emigranti kabuverdianu.
Na kel epuka, un di nos emigrantis txiga Fransa – Txeka di nha Txika. Txeka ka sabeba franses. Nen merci beaucoup! Alias, na dia ki Txeka txiga, el staba kuazi ta dadji na un garson ki fla-l merci beaucoup kantu longa-l troku na un bar – Txeka pensa ma omi sa ta kobaba-el. Franses skapa pa un tris. Sin, Deus ki djuda, patrisius di Txeka baba resebe-l. Es ruma nel, pega-l, ta kalma-l:
– Txeka, ka bu dadji! Garson ka sa ta manda-bu mete troku na bu ku, nau! El sa ta fla-bu “Mutu obrigadu!” na lingua di es tera li, na franses.
– Mas, asi ki es gentis ta papia mariadu!? Mi era kapas di jura ma el fla-m: – Mete na bu ku!
Na verdadi, Txeka di nha Txika ka sabeba nen le na purtuges.
Na un dumingu, pokus dia dipos ki Txeka kaba di txiga Fransa, el staba na stason di autokaru ta spera prosimu autokaru. Kel stason di autokaru ta fikaba frenti di un igreja. Txeka sa ta baba fika ta toma autokaru na kel stason tudu dumingu, banda meiu dia, pa ba faze konpra di simana.
Na kel dumingu, enkuantu Txeka sa ta speraba autokaru, sai di igreja un monti algen ki baba un batizadu. Tudu konvidadu staba la kontenti, ta papia ku kunpanheru, ta tra fotu ku pesoa ki batizadu i ta nbrasa-l.
Txeka di nha Txika ta moraba nun kabu li na Kabu Verdi undi tudu algen konxeba kunpanheru. Di manera ki el sa ta pensaba ma e si me la na kel grandi sidadi di Fransa, pa undi el kababa di ba buska vida.
Txeka volta pa se vizinhu (ki bira ta ba konpra djuntu ku Txeka tudu dumingu), purgunta, ku ajuda di jestu:
– E kenha ki batizadu?
Se vizinhu stranha es purgunta, nkodje onbru i risponde-l:
– Je ne sais pas.
Na dumingu siginti, Txeka ku se vizinhu staba di novu na mesmu stason di autokaru i na mesmu ora – banda meiu dia. Di es bes sai di igreja un monti gentis ki staba nun kazamentu. Tudu konvidadu staba sabi, ta papia txeu. Kes djenti staba so na nbrasa kazal ki kababa di kaza i ta tra fotu ku es kazal.
Txeka inda ka ntuaba. Se franses staba inda frakinhu. I inda el staba konvensidu ma tudu algen konxe kunpanheru na kel grandi sidadi sima ta kontese li na se aldeia li Kabu Verdi. Txeka purgunta se vizinhu, di novu ku ajuda di jestu:
– E kenha ku kenha ki kaza ku kunpanheru?
Se vizinhu stranha inda mas kel purgunta, mas nkodje onbru i risponde-l di novu:
– Je ne sais pas.
Pur fin i na tirseru dumingu, staba Txeka ku se vizinhu ta spera autokaru na mesmu ora i lukal. I tanbe na mesmu ora kumesa un korteju funebri na porta kel igreja di frenti di stason di autokaru. Txeka, ki ti inda ka tomaba jetu nen ku franses nen ku manera di pensa, purgunta se vizinhu, di novu ku ajuda di jestu:
– Koitadu! Nhordes ta da-l un kantu na Gloria! E kenha ki more?
Se vizinhu fika ta pensa ma Txeka ka ta rigula ben pa ta po-l, tudu dumingu, kel purgunta sen sentidu. Mas, idukadamenti vizinhu di Txeka nkodje onbru i risponde-l di novu:
– Je ne sais pas.
Txeka fika tristi. Nton, Txeka volta pa se vizinhu i fla-l konsternadu:
– Oh! Paxenxa propi! Koitadu je ne sais pas! El batizadu dja ten 2 simana, el kaza dumingu pasadu i el sa ta nteradu es dumingu li.
Marsianu nha Ida padri Nikulau Ferera
