Por: Marciano Moreira*
Ten partis ki ti ki kontadu, ta fladu na fin: Sapatinha ribera riba, sapatinha ribera baxu, kenha ki e mas pikinoti, ba panha un saku di dinheru la ribera baxu! O kenha ki sabe mas, konta midjor! Pamodi?
Sertamenti kenha ki komesa uza es frazi, sabeba pamodi el sa ta uzaba-el. Txeu konpatriota ta ripiti es frazi sen sabe pamodi el ta uzadu. Sima novus jerason ta ba ta susede autor di es frazi, e asin ki ta ba ta bira mas difisil sabe risposta ku serteza.
Nes ultimus 10 anu, sob titulu jeneriku “Nu ben konta partis”, N publika un grandi numeru di partis nes benditu jornal. Alguns di es partis ta ten es frazi na fin: “Sapatinha ribera riba, sapatinha ribera baxu, kenha ki sabe mas, konta midjor!” Es sirkunstansia disperta na mi gana di sabe pamodi ta uzadu es frazi na fin di sertus partis.
N purgunta txeu kontador di partis. N resebe disparis justifikason. Nes era di tilivizon ku internet, kontadoris di partis sa ta parti i, ku isu, posibilidadi di txiga ti verdadi sa ta diminui. Pur isu i pa posteridadi, N ta dexa li rijistadu kel justifikason mas veruzimil.
Si algun leitor sabe un otu justifikason mas plauzivel, N ta pidi-l pa el publika se verson o manda-m-el pa N publika. Si el kre, N ta identifika fonti. Pa justifikason ki N sa ta ben da, nha fonti ka kre pa N identifika-l:
“Sapatinha ribera riba, sapatinha ribera baxu…” surji na tenpu antigu, kuandu nos gentis ta tenba txeu difikuldadi na konsigi dinheru pa un par di sapatu, pabia dinheru era konta paga renda ku kunpra kes kuza esensial, sima sal ku fazenda. Pur isu, es ta fazeba tudu ki es podeba pa popa ses sapatu.
Pa izenplu, era kumun gentis di fora ben Praia diskalsu, pa ben laba pe ti ki es txigaba baxu Praia, pa kunsa kalsa sapatu so pa subi Praia (istu e, subi atual Plateau – sentru di sidadi di Praia). Ti ki es kababa trata di ses asuntu riba Praia, so es dixiba Praia, es ta tornaba tra sapatu. Tudu pa ka straga sapatu.
Inkluzivi, ta kontada ma, kel bes, ti ki algen di fora, na ta ben Praia, daba topada i fana dedu (istu e, panha pankada na dedu), el ta flaba ses boton:
– Filismenti N ka teneba nha sapatu kalsadu! Sinon, N al teneba nha sapatu tudu stragadu.
Sapatinha signifika da ku sapatu rixu na txon.
Di kes kaminhu di pe ki mas ta stragaba sapatu, era kaminhu dentu ribera, pabia txeia ta koreba na riberas normalmenti tudu anu i ta dexaba riberas xeiu di kalhaus, ku pizu mutu iregular. Purtantu, so un maluku al andaba dentu ribera ku sapatu na pe.
“Sapatinha ribera riba, sapatinha ribera baxu…” ta fladu ti ki bu kaba konta partis mirabulanti, partis inakreditavel, invensons puru. I, pa rialsa ma plateia ka debe akredita na kes partis, kontador ta fla plateia, na fin di partis, pa el ba faze algu ki so maluku al fazeba: sapatinha ribera riba, sapatinha ribera baxu, pabia isu ta straga un di kes kuza mas valiozu di kel tenpu: sapatu.
I pa sublinha inda mas ma partis ki plateia kaba di obi, ka e verdadi, ti ki plateia tene kriansas na meiu, kontador di partis ta akrisenta: Kenha ki e mas pikinoti, ba panha un saku di dinheru la ribera baxu! Si plateia ka tene kriansas na meiu, kontador di partis ta akrisenta: Kenha ki sabe mas, konta midjor!
Klaru, si staba un saku di dinheru la ribera baxu, kontador di partis al baba boka kaladu el me panha es saku dinheru. Pa otu banda, si partis ki bu kaba di obi era verdadi, kontador ka al flaba “kenha di sabe mas, konta midjor”, pabia verdadi e so un.
*Marsianu nha Ida padri Nikulau Ferera
www.facebook.com/marcianormoreira
