Por: Marciano Moreira*
Tenba un bairu di nomi Txuba Txobe, undi finadus ta maltrataba algen ki ka trata-s sima era tradison. Tudu algen di kel zona ta rispetaba tradison, pabia kes finadu ka ta perduaba. I tradison era kel li: tudu algen ki ba un bar toma grogu, ta dexaba un pingu na kopu pa finadu. Kel pingu tenba ki botadu na paredi, djuntu ku fla:
– Toma, difuntu fulanu di tal!
Normalmenti, kada un ta mensionaba se ultimu kunpanheru di parodia ki ba pa mundu di verdadi. Si un pesoa ka tenba ninhun kunpanheru di parodia falesidu, el ta flaba:
– Pa kenha ki oji ka modja garganta inda!
Ningen ka tenba koraji di bebe tudu pa ka dexa nada pa kes finadu ki, antis di more, ka ta largaba bar.
Un dia, 2 kunpadri konxedu pa Kaká ku Seza txiga Txuba Txobe. Es 2 kunpadri ta moraba lonji di Txuba Txobe. Kaká ku Seza dja entraba na tirseru idadi. Es ka sabeba ma, na Txuba Txobe, finadus era matxikadu.
Es 2 kunpadri entra nun bar, xinta na meza i es manda ben 2 kopu di grogu ku 2 posta txitxaru fritu. Es benba di lonji, di manera ki es sa ta prisizaba modja garganta i kume un bon bafiu. Bar staba ku txeu algen di zona, tudu animadu ta toma ses kaku i ta po konbersu en dia. Kaká era mas rapidu na bebe grogu – el manda baxu kel kopu di grogu di un bes, uas! Tudu otus djenti ki staba na bar, fika spantadu i ku medu. Nton, Kaká purgunta:
– Mas, pamodi ki nhos tudu tene odju ragaladu i boka abertu sima ki N tene santxu na piskos?!
Dona di bar, admirada, kudi ku un otu purgunta:
– Mas, nho nhu ka sabe ma debe dexadu un pingu di grogu na fundu di kopu pa finadus ki ta sta pa tudu kantu di es bar?!
Furasteru Kaká labanta onbru ku ar di balenti:
– Ki nporta-m la ku finadus!
Dona di bar insisti, nun ton di avizu:
– Di zimola, ka nhu fla asi, pabia finadus li ka ta brinka! Kenha ki ka rispeta-s, ta pasa marmi ku es!
Kaká sai ku dizafia:
– N ka ten medu di omi salbaxi, kifari di kadabra! – i, pa konpostura, Kaká bira rostu pa un kantu di bar, ku ar di sa ta papia ku un di kes finadu:
– Oh kadabra, toma li! – Kaká, ku ar di total disprezu pa finadus, faze finadu sinal di mangitu.
Mas, Kaká muda kara di rapenti kuandu el da fe ma el ka sa ta podeba muda pozison di ses brasu. El katrisa, el katrisa, mas ses brasu fika na mesmu pozison di “Toma li!”. Kaká bira soris ta baza sima el ba ta ntende ma, pabia di kel mangitu, el sa ta baba odja berdi – el sa ta baba fika, pa tudu se bida, ku brasus na kel pozison di mangitu. Kaká fika ku lagua na odju ta djobe pa tudu algen dentu bar. Dentu kel, Kaká da ku duedju na txon, kumesa ta pidi sokoru:
– Nhos fla-s pa es purdua-m! N ka bon di kabesa. E verdadi – nha kabesa ka ta rugula mutu ben.
Djentis na sala fika tudu ku pena di Kaká. Nton, es kumesa ta reza. Reza di li, reza di la, ti ki Kaká kumesa ta mexe ku brasus. Mexe divagar, mexe mas faxi, mexe ti ki el konsigi disfaze mangitu i fika dretu.
Kel otu furasteru di nomi Seza, rapidu sima lus, faze se kalku: ami ki dja ten txeu tenpu N ka panha Praia, es oportunidadi li, N ka ta fadja-l…
Seza pega se kopu, el labanta, el ba fika na meiu di sala, sakedu, pe ragatxadu pa tudu algen odja, el leba kopu boka i, nun so goli, el manda grogu pa fundu di se garganta. Ka fika na kopu nen un gota di grogu pa finadu!
Djentis prizenti fika kexu kaidu. Es ka podeba ntende modi ki un algen, dipos di sisti tudu kel prublema ki se kunpanheru pasa, pa ben ripiti mesmu trakinisi. Dona di bar xklama:
– Kel la sta dodu baridu!
Nton Seza stika se nobegu i fla:
– Ki nporta-m la ku finadus!
Pa spantu jeral, el panha Praia ton matxikadu ki tudu djentis nota. Djentis leba mon na testa pa benze. Seza salta na altura, tra se txopu, riska na paredi ku uma forsa ti ki sai faiska sima iskeru ku falta di gas, i djata sima djaki balenti:
– Kenha ki reza, N ta mata!
Marsianu nha Ida padri Nikulau Ferera
