PUB

Opinião

Nu ben konta partis: Ka ta txiga 1 kilu!

Marsianu nha Ida padri Nikulau Ferera

Na anus 60 di sekulu XX, Txiku di Ana ba Purtugal. Txiku ka sabeba le. Antis di el nbarka, el ta viveba na un aldeia di interior di un di nos ilhas. Txiku ka tenba kustumu di obi algen ta papia purtuges, di manera ki kuazi el ka ta ntendeba purtuges.

Na kel tenpu, ta bada Purtugal di barku. Txiku leba se katxor.

Kantu el dizenbarka la Lisboa, el tenba ki toma konboiu pa el txiga se distinu final. Txiku ba pa entra na vagon pa pasajerus ku katxor se tras. Es fla-l ma ten vagon ki ta transporta so limaria, pa el ba kunpra mas un bilheti so pa se katxor.

So ki Txiku atxa ma bilheti pa katxor staba karu di mas. Txiku da pa spertu: el muda pa konboiu so di pasajerus, el ba mara se katxor tras di ultimu karuajen i el entra nes karuajen pa el pode fika pertu di se katxor. Konboiu da rinkada. Un bokadu, Txiku labanta i ba djobe si se katxor ka kapri. El odja katxor denti raganhadu:

– Bo e xuxanti, katxor! Bu ka paga bilheti, bu sa ta viaja na ka kusta, pabia disu bu sa ta faze trosa di donu di konboiu. – Txiku brinka ku se katxor sen da konta ma katxor dja staba mortu seku rusu.

Txiku ba xinta na se kabu, xintidu diskansadu, konvensedu ma katxor sa ta ba dretu tras di konboiu, prontu san di saudi. Mas, kantu es txiga distinu final, Txiku ba dismara katxor, el atxa so padas di korda maradu na konboiu. Di se katxor, nen sinal:

– Di favor, nhu ka odja-m un katxor ku pintas branku na testa? – Txiku komesa ta purgunta pesoas.

Ningen ka sa ta ntendeba se purgunta… Dizanimadu, Txiku dizisti di anda tras di katxor, ba penson undi el debeba fika na primerus dia, timenti el ka atxa un moradia pa renda.

Txiku atxa ma kama di se kuartu era finu di mas pa el. El rizolve deta baxu kama. Un par di enpregadus di penson ben di madrugada djobe kuartu, ka odja ningen riba kama, kuda kuartu staba dizokupadu. Omi ku mudjer era amanti. Es rizolve ba pega kunpanheru sukundidu di jerensia na kel kuartu di Txiku.

Kantu es entra, Txiku dja baba na sonu. Un bokadu, amantis komesa ku stribilin riba kama dadji Txiku korda. Kazal sa ta komesaba txiga fin di korida:

– Ai, amor! Ai, amor! Estou nas nuvens! Estou a voar! Estou a ver Lisboa! Porto! Coimbra! Estou a ver o Portugal todo!!!

Txiku sai fakati di baxu di kama:

– Eh nha, di zimola, nha djobe si nha ta odja na pundi nha katxor sta!

Par spanta ku kel vultu pretu ki parse di rapenti:

– Diabo! Diabo! Diabo! – es fika ta grita, djuntu ku bua di kama, santa karera pa fora di kuartu, un tras di otu, nunpriti, sima Deus po-s na mundu.

Txiku fika ta matuta tristi:

– N tene poku sorti! Dja N perde mas un xansi di atxa nha katxor. Mudjer sa ta odjaba tudu kabu, mas el nega djuda-m…

Dentu kel, pupu da Txiku. El ba kaza banhu. El atxa ma, sima kel sanita staba branku albu, el ka debeba suja-l. Txiku rizolve pupu na peuga. El abri janela, el tora meia, el bota di kel 2º andar, kuza da na txon li di baxu, txlop, frenti di un pulisia.

Pulisia odja pa riba: un so janela e ki teneba algen. Pulisia subi. Kantu el entra na kuartu ki teneba algen na janela, el odja pingus di sujidadi dja toma paredi, tetu i txon di kuartu. Kes pingu spadja kantu Txiku tora meia antis di fulia.

Dianti di tudu kes prova, pulisia ka tenba mas duvida ma era di kel kuartu ki fuliadu meia xeiu di pupu. Pulisia leba Txiku janela, ponta dedu pa kel meia ki inda staba la di baxu, xeiu di pupu i purgunta:

– O que é aquilo?!

– Ka ta txiga 1 kilu! – Txiku risponde ku konfiansa na vos.

Autoridadis manda Txiku di volta pa Kabu Verdi. Kantu el purguntadu pamodi el obrigadu volta, Txiku di Ana risponde:

– Purtugal dja bira mariadu: kes ki ta koka mas ki 1 kilu, Pulisia sa ta manda pa tras moku!

Adicionar um comentário

Faça o seu comentário

O seu endereço de email não será publicado. Campos obrigatórios marcados com *

PUB

PUB

To Top