Por: Marciano Moreira
N ta bazia na tioria universalista sobri orijen di kriolus di es planeta, ki N ta adapta a spesifisidadis di Storia di Kabu Verdi.
Ten diversus tioria sobri orijen di kriolus di es mundu. N ta akredita na tioria universalista, kuju autor e Avram Noam Chomsky, profesor emeritu di linguistika di 2º midjor universidadi di mundu, konxedu pa sigla MIT.
Kuandu Purtugezis txiga Kabu Verdi na 1460, es ka atxa ningen. 2 anu mas tardi, es komesa povuamentu di Kabu Verdi, mas spesifikamenti li na Ilha di Santiagu, na atual Sidadi-Velha – Bersu di Nason Kabuverdianu. 3 anu mas tardi, istu e, na 1465, pesoas di Kosta Osidental di Áfrika komesa txiga Santiagu. Maioria di es Afrikanus trazedu na kondison di skravu.
Maioria di nos antipasadus Negru ben di zona ki ta fika entri Riu Senegal i Norti di Sera Lioa. Normalmenti es ta kapturada na interior di es zona di Áfrika Osidental, un rijion undi ta prevalese linguas “N ko”, substratu di nos lingua. Es familia linguistiku e konxedu pa “N ko”, pabia tudu es ta uza spreson “N ko”, ki signifika “N fla” na nos lingua. Fazendu jus a nos kondison di Kriolus, nu ta mistura palavra “N” di linguas “N ko” ku palavra “fla”, kuju etimu e 3º pesoa di singular di prizenti di indikativu di verbu purtuges “falar”. Istu e, sklavajistas ku kolonialistas ka konsigi mata “N”, ka konsigi mata spiritu di nos antipasadus maioritariu!
Sigundu invistigador António Carreira, trazedu skravus di 27 tribu. Kada tribu ten se lingua. Istu e, kes skravu ka ta ntendeba kunpanheru na rispetivu lingua maternu. Pa konplika, sklavajistas ta tentaba po, na kada grupu, skravus di diversus tribu pa obriga-s uza rudimentus di purtuges na kumunikason entri es ku objetivu di es mesmus sklavajista aumenta ses kapasidadi di kontrola es skravus, pa difikulta es skravus di djunta kabesa pa rivolta o pa fuji. Rudimentus di purtuges ki es skravus ta prendeba na anbitu di prusesu di ladinizason ti ki es txigaba li na Santiagu.
Es sirkunstansias rizulta nun falar ki ta karaterizaba pa straordinarius diferensa idioletal, undi kada skravu ta papiaba di se manera, kada ora di un manera diferenti, konsuanti lingua maternu di kada un, konsuanti durason i intensidadi di kontaktu di kada un ku Purtugezis. Es tipu di falar sen regras e konxedu, na siensia, pa pidgin.
Fidjus di es skravus ki ben ta nase li na Santiagu – Kriolus – ka konxeba lingua maternu di rispetivus prujenitor. Prujenitoris di es Kriolus ta uzaba pidgin entri es i, pur isu, es prujenitoris ka podeba fla es Kriolus “- E ka asi ki ta fladu!” o “- E asi ki ta fladu!”, pois ka tenba “E asi ki ta fladu”, pabia kada un ta papiaba di se manera, kada ora di un manera diferenti. Ka tenba regras, ka tenba gramatika.
Es sirkunstansias da Kriolus liberdadi di uza kes palavra ki es ta obiba di boka di ses prujenitoris pa forma frazis uzandu lojika linguistiku inatu, istu e, uzandu lojika linguistiku ki tudu ser umanu ta nase ku el, uzandu gramatika universal. Pur isu, es tioria txoma tioria universalista.
Ku suseson di jerasons, es forma di papia di es Kriolus bira un tradison, istu e, novus jerason di Kriolus ben fika ta ten kondison di fla ses fidjus “- E ka asi ki ta fladu!” o “- E asi ki ta fladu!”. Purtantu, ses falar pasa ta ten regras. Ku isu, Kriolus konferi ses falar un gramatika, istu e, es bira ses falar lingua – kriolu kabuverdianu o lingua kabuverdianu.
Kel li ki e orijen di nos lingua! I nu debe ten grandesa ku nos lingua, un lingua ki ten un gramatika universal!
Marsianu nha Ida padri Nikulau Ferera
