Marciano Moreira*
Na kel bes, kuazi ka tenba algen ki sabeba le ku skrebe na nos tera. Na se zona, Txiku era uniku algen ki sabeba tioto ku rabiska.
Txiku dja staba ku ses 40 i tal anu di idadi. El era sakriston. Abridu un obra publiku na zona. Kuandu funsionariu di Stadu ben purgunta padri di zona pa algen ki sabeba le ku skrebe, nhu padri limia nomi di Txiku.
Dirijentis di Obras Publiku po Txiku kapatas.
Txiku resebe un folha di kontrolu di prizensa ku nomis di tudu algen di kel frenti di trabadju, inkluindu nomi di el Txiku – Francisco Lopes Monteiro. Nomis staba pur orden alfabetiku.
Duranti kel kinzena i na ora di pega trabadju, Txiku ta txomaba tudu algen ki staba santadu na kel folha di pontu. I el ta fazeba tudu sima nhu padri nxina-l: po sinal di prizenti frenti kenha ki kudi i sinal di auzenti frenti kenha ki ka kudi.
Kuandu kinzena kaba, funsionariu di Obras Publiku ben toma folha di pontu pa ba priparadu pagamentu.
Txiga dia di pagamentu i pagador ben faze pagamentu li na obra. Pagador txoma i paga kada trabadjador ki tenba dinheru pa resebe. El txoma i paga tudu algen di kel frenti di trabadju, menus Txiku.
Kuandu pagador komesa ruma ses kuza pa da rinkada, Txiku fla pagador:
– Nhu skese paga-m.
– An?! Modi nhu txoma?
– Txiku Batxitxa.
– Nau. Nomi di igreja…
– An! Francisco Lopes Monteiro.
Pagador djobe na folha di pagamentu, el ka atxa ninhun Francisco Lopes Monteiro. El kuda dadu eru na pripara folha di pagamentu. El ba panha folha di pontu dentu se pasta pa konferi. Spantadu, el fla:
– Mas, na folha di pontu, sta ma Francisco Lopes Monteiro ka ben trabadja nen un dia siker!
Enfin, Txiku ba ta prende arti di ser kapatas sima tenpu ba ta pasa.
Dipos di uns tenpu, Obras Publiku fika sen pagador pa kel rijion undi Txiku era un di kes kapatas. Sima ta fladu, na tera di segus, kololu e rei – Obras Publiku disidi promove Txiku pa postu di pagador.
Antis di seta novu kargu, Txiku ba obi konsedju di nhu padri. Kuandu nhu padri splika-l ma el ta fika ta ganha serka di 2 bes mas si el seta novu trabadju, Txiku da un zas pa djipi di dirijentis di Obras Publiku pa ba fla-s ma el ta seta ser pagador.
Funsionarius di Obras Publiku da Txiku so un lamire sobri arti di ser pagador, afeta-l un djipi ku un xofer, ntrega-l primeru folha di pagamentu ku rispetivu folha di pontu, un pasta di peli ku un sakutelu di koru, un kaneta i manda-l labanta dinheru na Tizoreru di Ripartison di Finansas.
Bazofu na djipi, Txiku ben faze se primeru pagamentu na un di kes frenti di trabadju di se rijion. El txoma kada trabadjador ki staba na folha di pagamentu i el paga rispetivu kuantia indikadu na folha di pagamentu. Tudu algen ki el txoma, kudi-l.
Kuandu el paga ultimu trabadjador konstanti na folha di pagamentu, dinheru kaba na sakutelu. Da Txiku kudadu kuandu el djobe na folha di pagamentu, el odja mas un linha skrebedu baxu di nomi di ultimu trabadjador i el spreta dentu sakutelu i el ka odja nen un binten.
Txiku fika ta matuta:
– Manba N era na konta dinheru pa dinheru dja kaba-m i inda sa ta falta 1 algen pa N paga!? Dja N fronta!
Dentu kel, Txiku nota ma tudu algen sa ta baba se kaminhu. Isu da-l koraji. Nton, el txoma:
– Total!
Ningen ka kudi. Aliviadu, Txiku komesa ruma ses kuza numa forsa pa el da rinkada. Kuandu djipi afasta di lugar di pagamentu, Txiku fla ses boton:
– Filismenti Total ka ben!
*Marsianu nha Ida padri Nikulau Ferera
