Por: Marciano Ramos Moreira*
Txiku dja staba na ultimu anu di liseu. Alunu abuzadu sima el ka tenba na kel liseu tamanhu. Un di ses trakinisi era xuxa ku prufesoris.
Un dia, prufesor di purtuges purgunta, na un pontu, kal ki era personajen prinsipal di un pikenu kontu. Txiku (dipos di sertifika ma dja el rispondeba kes otu purgunta ku siguransa ki ta garantiba-el un rizultadu satisfatoriu) skrebe es risposta na pontu, pretu na branku:
– Mas, prufesor, si, nho ki le kontu primeru, nhu ka sabe kal ki e personajen prinsipal, pamodi nhu sa ta purgunta-m?!
Un otu dia, prufesora di storia purgunta Txiku, oralmenti, kal kaminhu maritimu Vasco da Gama sigi pa ba Índia? Txiku risponde, pa spantu di turma:
– Mas, prufesora, ami N ka sabe dretu nen kal ki e kaminhu ki N debe sigi pa N txiga kaza di nha dona la Txuba Txobe, ago nha ta ben purgunta-m kal kaminhu Vasco da Gama sigi, dja ten un monti di sekulu, pa ba un tera ton lonji sima Índia?! Eh nha, kantu el sigi es kaminhu, inda N ka naseba!
Mas, xuxadera ku mas piada kontise na un di kes izami final (PGI). Txiga na turma, pa superviziona izami, un prufesor ki ka konxeba alunus di kel turma:
– Es izami di matimatika ta dura 2 ora izatu. Nes mumentu, sta 8 ora i 7 minutu. Purtantu, nhos ten ki ntrega izami antis di 10 ora i 8 minutu, inpreterivelmenti. N ta dizeja-nhos txeu sorti!
Alunus kumesa ses izami. Dipos di algun tenpu, es ba ta ntrega izamis. Ba ta ntrega, ki kantu txiga me 10 ora i 7 minutu, so Txiku ku prufesor ki fikaba na sala – tudu kes otu alunu dja ntregaba ses izamis.
Prufesor ruma izamis ntregadu nun pilha, riba sekretaria. El aviza ma dja sta na ora di ntrega izamis. Kantu pasa mas uns 3 minutu, el fla ma kel era ultimu avizu. Ma, di kel mumentu mas 1 minutu, el ta kumesa marka na izami “ntregadu dipos di ora”.
Prufesor fika intrigadu ku kel alunu ki, na diskontra, sa ta kontinuaba ta faze se izami:
– Pamodi ki kel alunu la sa ta kontinua ta skrebe ku tudu kalma i ka sa ta ntrega izami? – prufesor fika ta purgunta se kabesa. Pur fin, prufesor disidi ma el ta marka, na izami di kel alunu, “ntregadu dipos di ora”.
Txiga un pontu, prufesor labanta, kumesa ruma kuzas pa abandona sala. So na kel instanti, kantu dja pasaba serka di 12 minutu dipos di limiti di tenpu, e ki Txiku kunsa labanta, ben ku se izami na mon, divagar, sen fadiga i longa prufesor.
– N ta marka, na bu izami, “ntregadu 12 minutu dipos di tenpu limiti”! – riaji prufesor.
– Mas, prufesor, bu ka sabe ku kenha ki bu sa ta papia?! – purgunta Txiku, ta ñuli prufesor manenti, sima si prufesor era un inpustor.
– N ka sabe. Nunka N odjaba-bo nes liseu.
– Bu ten serteza ma bu ka konxe-m? – insisti Txiku, inda ku se ar altivu.
– Serteza absolutu! – riafirma prufesor, dja un poku xatiadu ku kel ar di inpurtanti di kel alunu dizaforadu.
Nun zas, Txiku rabata se izami ki dja staba na mon di prufesor, pega na kel pilha di izamis ki staba riba sekretaria, tufudja se izami na meiu, baradja kel pilha di izamis, torna koloka-l riba sekretaria, da rinkada faxi pa rua i, na porta di sala, fla prufesor (ki staba inda spantadu, boka abertu) ku vos firmi i rostu nfanhidu:
– Ba diskubri mi e kenha!
Sapatinha rubera riba, sapatinha rubera baxu, kenha ki sabe mas, konta midjor!
Marsianu nha Ida padri Nikulau Ferera
