Por: Marciano Ramos Moreira*
Desdi 1885 ki Kabuverdianus sa ta tenta inventa un alfabetu pa nos lingua! Na 1998, Guvernu ofisializa nos alfabetu a titulu sperimental. I, na 2009, Guvernu bira es mesmu alfabetu na alfabetu kabuverdianu ofisial a titulu difinitivu.
Ku otus palavra, nos alfabetu dja ten dja mesmu statutu ki alfabetu purtuges!
Ifetivamenti, nos konteraniu António de Paula Brito kaba se obra “Apontamentos para a Gramática do Crioulo que se Fala na Ilha de Santiago de Cabo Verde” na dia 8 di dizenbru di 1885 li nes sidadi ki ta uni-nu (Praia). Dja ten kuazi 139 anu ki inisia prusesu di kriason di nos alfabetu! Kantu es nos konpatriota kaba se obra, el skrebe kel li na Didikatoria:
“E ku mas grandi gostu ki N ta prisenta-nhos es istudu pa nu pode faze gramatika di nos lingua.
Nhos le-l ku tensan, i nhos menda-l ku rezan.
Nhos lenbra k’e promeru trabadju d’es kolidadi ki nu ten, sendu sertu ki pa N faze-l N ka atxa un so iskritu kiriol pa sirbi-m di moldi.” (fin di sitason)
Onra iternu pa es patriota ki txoma nos falar “nos lingua” dja ten 139 anu, na 1º diseniu apos fin ofisial di skravatura! Kel li e straordinariu si nu leba en konta ma ti dia di oji inda ten algen ki ta konsidera se kabesa Kabuverdianu, mas ka ta konsidera nos falar “nos lingua”!
Na se obra, es grandi patriota difende prinsipiu di univosidadi entri grafema i fonema pa nos alfabetu. Kuze ki es prinsipiu signifika? El signifika ma kada son debe skrebedu so di un manera na kualker palavra ki es son ta surji i ma kada letra debe riprizenta apenas un son na kualker palavra ki es letra uzadu.
Un izenplu: na un ditadu, ti ki fladu un kriansa pa skrebe “jeito” na purtuges, el ta fika ta purgunta se kabesa si el debe skrebe-l ku “j” o ku “g”. Pamodi? Pabia, na purtuges, ten 2 manera di skrebe son [ʒ] (1). Si tenba so 1 manera di skrebe son [ʒ], kriansa ka al tenba duvida nen ka al tenba ki dikora ortografia di es palavra.
Mas, e ka so son [ʒ] ki ten mas di 1 manera di riprizenta-l na purtuges. Ten inda otus son. Nu ta ben odja-s na prosimus ensaiu.
Rispetandu prinsipiu di univosidadi entri grafema i fonema, kriansa ka meste dikora ortografia di ninhun palavra.
Tudu kenha ki kre kontribui pa futurus jerason sofre menus ki nos, debe difende es prinsipiu umanu!
Serka di 41 anu dipos i la Praga (na 1926), Asosiason Fonetiku Internasional riuni kes midjor kabesa di mundu interu na aria di linguistika. Nes riunion, es fina flor di linguistika difende mesmu prinsipiu ki António de Paula Brito difende!
Serka di 94 anu dipos (na 1979), Kulokiu di Mindelu sobri Kriolu difende mesmu prinsipiu ki António de Paula Brito difende! Guvernu ki organiza es kulokiu.
Serka di 104 anu dipos (li na Praia na 1989), Forun di Alfabetizason Bilingi difende mesmu prinsipiu ki António de Paula Brito difende! Guvernu ki organiza es forun.
Serka di 109 anu dipos, na 1994, Grupu pa Padronizason di Alfabetu difende mesmu prinsipiu ki António de Paula Brito difende! Guvernu ki kria es grupu.
Serka di 113 anu dipos, na 1998, Guvernu bira es prinsipiu lei ku karater sperimental.
Serka di 123 anu dipos, na 2008, Meza-Rodondu pa Avaliason di ALUPEC difende mesmu prinsipiu ki António de Paula Brito difende! Guvernu ki organiza es Meza-Rodondu.
Serka di 124 anu dipos, na 2009, Guvernu bira es prinsipiu lei ku karater difinitivu!
Na verdadi, nos patrisiu António de Paula Brito e un jeniu! I nu debe orgulha di nos patrisiu António de Paula Brito i di alfabetu kabuverdianu, un alfabetu umanu!
Marsianu nha Ida padri Nikulau Ferera
_________________
(1) Alfabetu fonetiku internasional – kada son
Entri […], N uza alfabetu fonetiku internasional. Si bu ka konxe algun di kes letra, bu ta ba nes link https://tfcs.baruch.cuny.edu/z/ i bu ta substitui ultimu letra /z/ pa letra di alfabetu fonetiku internasional ki bu ka konxe. Bu ta uza novu link pa bu obi son di es letra. Pa izenplu, si bu ka konxe letra ʃ, bu ta substitui ultimu letra /z/ pa /ʃ/ i bu ta uza novu link https://tfcs.baruch.cuny.edu/ʃ/ pa bu obi son ʃ.
Obs.: es soluson ta funsiona so pa sons ki ta izisti na ingles. Pa kes otu son, konsulta: https://tinyurl.com/mps2dxz7
