Por: Marciano Moreira*
Era un bes, tenba un kumadri ku un kunpadri. Es era mutu amigu desdi kriansa. Dja es staba na kaminhu di 40 anu di idadi. Es tudu dos fika viuvu sedu. Es ta moraba na mesmu aldeia, so ki kada un na un banda di ladera di un grandi ribera ki ta dividiba kel aldeia na metadi.
Kel dia, kumadri di nomi Txuka Pala ba kaza se kunpadri, ki ta txomada Txiku Djon:
– Boa-tardi, kunpadri Txiku! Modi nhu sta di korpu?
– Boa-tardi, kumadri! Ale-m li sima Dios kre – kalka prutxi, froxa bua.
– N ben pidi-nho un favor, kunpadri.
– Nha fla, kumadri! Nha sabe ma mi ku nha e more, xinta na stera.
– Kunpadri, na kel txuba ki ben sabadu ki pasa li, nha kasa fika ta pinga. N tenba xintidu di spera ti bolta di anu pa N tornaba kubri-l, mas ka ta da pa spera mas ki si. Dja N ranja alguns fexu padja, karis i korda karapati. Tudu sta montiadu dentu kintal. N ba nprista Txunbin se skada. Di manera ki N ben odja si nhu podeba ba, sin ki nhu ten tenpu, pa nhu ba torna kubri nha kasa.
– Ka ten prublema! Tenpu sta ku gana txobe. Di manera ki nu ka debe perde tenpu. Si nha kre, N ta ba la kubri-nha kasa manhan sedu.
– Sta dretu! Manhan sedu si Deus kre. N ta spera-nho.
Kel otu dia me, Txiku dja staba na porta se kumadri dentu sedu:
– Kumadri Txuka, bon dia! E pa nu kumesa sedu, pa sol kenti atxa-nu avansadu. Asin, si nu ka kaba antis sol fika ta kema, ta fika-nu poku pa kaba di tardi, dipos ki sol branda.
– Bon dia, kunpadri Txiku! Nhu ten razon! Mas, saku baziu ka ta sakedu. Nhu ben, nu ben kebra djudjun primeru. Gosi ki N tra kuskus di bindi, sima kunpadri ta gosta.
Kebra-djudjun era leti kabra fresku ku kuskus kenti. Kunpadri ku kumadri kumesa kubri kaza logu dipos di kebra-djudjun. Sima Txiku fla me, trabadju dja staba adiantadu kantu ta daba meiu-dia. Es para i torna toma trabadju dipos di almosu kantu sol branda. Almosu era fixon, ku kobi, ku karni kabra salgadu. Txiku Djon kume, lanbe bexu.
Es kaba kubri kaza dja dentu ta fuska fuska. Sima Txiku Djon pega skada djenti pa leba, e si ki kel uma Santa Maria di txuba ben! Dentu faxi, agu sa ta disprindaba di tudu txada, rostu baxu. Txeia toma kel ribera grandi. Txeia forti ta ronka na ribera i ta treme txon ti ki garafas riba meza fika ta da na kunpanheru klin klin klin.
– Kunpadri, kel txeia la ka ta da pa salta. Nu ta djanta. Si txeia branda, nhu ta ba kasa di-nho. Si ka branda, nhu ta durmi ku mi oxi. – Txuka fla, djuntu ku kumesa da volta pa sirbi katxupa ku tosinhu, ku fava. Rei di sabi!
– Nha ten razon! N ta deta riba di es banku li. – kudi Txiku, ku un poku di vergona di kel ideia di pasa noti dentu di un kaza djuntu ku se kumadri, es so.
– Riba kel banku rixu la go, nhu ka ta deta. Nha kama e grandi… Ka nhu fika ku burgonha. Nos tudu e maior i vasinadu…
– Mas, kumadri Txuka Pala, kuze ki vizinhus ta fika ta pensa?
– Anos e donu di nos naris! – risponde Txuka, rostu kontenti.
Txuba kontinua ti dipos di janta. Txuba bedju. Stribilin un pregu ba na ribera. Txiga ora deta, Txiku fika ta djongo, na prigu kai di moxu. Txuka po un tirbiseru kunpridu na meiu di kama:
– Kunpadri Txiku, mi N ta deta primeru di ladu di paredi i nho nhu ta deta dipos di es ladu li. Nho di frenti, mi di tras, sima na tenpu di difuntu! Kunpadri, forti N ten sodadi di nha kunpanheru! Asves, N ta korda noti, N ka ta konsigi durmi, so vontadi di brasa-l. Difuntu dexa-m noba, mi so. Nho tanbe, dja nhu fika nho ku Dios na seu. E nos poku sorti!
– E ti si ki nu merese. – Txiku fla, ta bana kabesa, ku ar pensativu i tristi.
Na verdadi, Txiku era un bokadu akanhadu. Kantu se kumadri kumesa duspi, Txiku volta kara pa otu banda i so el djobe pa mudjer kantu viuva dja staba detadu i kubertu ku lansol. El ba deta na se ladu, ketu, sen tra ropa. Txuka fika ta da folgu rixu, vira na kama, mexe tudu mexe, mas Txiku fika ketu na se ladu. Txiku Djon ka fla nen po nen pedra.
Kalor da Txuka, el fla omi pa es tra lansol pamodi el Txuka sta soris ta baza. Mas, omi kontinua detadu rostu pa ladu ki mudjer ka staba.
Dizanimada, Txuka fla omi pa kosa-l kosta. Txuka subi konbinason di kualker manera. Txuka Pala fika so na saia branku. Saia branku ki, sima el Txuka subi konbinason sen kuidadu, subi tanbe, txeu ka poku. Txiku Djon fitxa odju, kumesa reza Kredu i po ta kosa viuva kosta. Mudjer fika so na fla omi pa ba ta kosa-l kada bes mas baxu. Sima Txiku fika ta kosa mas pa baxu, e si ki el fika ta reza mas altu. Na kel brinkadera, kalor pasa viuva, mudjer ba na sonu xeiu di raiba di kel reza di se kunpadri.
Kantu manxe, txuba dja paraba bedju na tenpu. Txeia inda staba na ribera, mas dja el staba fraku:
– Kumadri Txuka, txuba dja para ka di oxi, txeia dja branda, N ta ba tenta salta rubera gosi li.
– Kunpadri Txiku, ka nhu ba inda. Nhu ka ta konsigi salta kel txeia la. – Txuka dispara, inda xeiu di raiba di kel kunpadri pioku ki, riba kama, ka ta toma ninhun pruvidensia dun omi.
– Nau, kumadri, N ta pensa ma un omi ta konsigi salta kel txeia la.
– Sin, kunpadri, un omi ta konsigi salta kel txeia la, mas nho nhu ka ta konsigi salta-l. – Txuka fla-l ku rostu runhu, ta ñuli-l manenti.
– Mas, pamodi, kumadri?!
– Nen kel tirbiseru la, nhu ka konsigi salta…!
Marsianu nha Ida padri Nikulau Ferera
