Por: Marciano Moreira*
Era un sabadu di tardi, un tardi di un grandi derbi na Stadiu di Varzia – Sporting di Praia kontra Ribera Grandi!
Txiku, ku uns 25 anu di idadi, era un ferenhu di Sporting di Praia. Ti ki Sporting sa ta ba djuga, el ka pode fadja – el ten ki sta na kanpu ta torse pa se ekipa. Txiku era grandi amigu di Txeka desdi kriansa. Es 2 rapas li tenba mesmu idadi i es ta viveba na Txada Santantoni. Mas, Txeka go era adeptu di Ribera Grandi, ekipa di Sidadi-Velha, nobu na 1º Divizon, ki sa ta ganhaba fama kada bes mas, sima jogus sa ta ba ta pasaba. Di manera ki es ta staba so na diskuti futibol.
Na kel tardi, Txiku staba sabi pabia se ekipa staba forti na kel epuka. Xeiu di mural, Txiku bisti se kamizola i po se kaxkol – tudu di Sporting di Purtugal – i ba txoma Txeka pa es ba odja jogu. Txeka ta moraba na un primeru andar, ku skada di asesu di pa fora, ngostadu na npena di prediu, di primeru andar dixi na linha retu ti txiga txon. Txeka ta moraba ku se mai, ki txomaba nha Txuka. Kantu Txiku txiga, porta di apartamentu di Txeka staba abertu. El subi kel skada stretu nun uas i entra sen konko kifari pidi lisensa pabia el era mininu di kaza:
– Nha Txuka, nha da-m benson. Nonse dja nha pripara agu mornu pa txapitxapi kosta fidju matxu di-nha? Oji, nu ta da-s purada ki es ka ta skese nunka mas!
Nha Txuka, ku ar priokupadu, sakedu na janela ta spia pa rua, fla:
– Deus abensua-bu, nha fidju!
Txiku nota kel ar tristi di nha Txuka. Txeka staba na se kuartu. Txiku entra na kuartu:
– Mas, Txeka, kuze ki bu mai tene? El sta sin di txora!
– Nha irma Txutxa dja largadu di Ospital di Trindadi. Gosi li ki Txibita, nha amigu di trabadju, telefona-nu la di riba Praia ta purgunta si dja el txiga kaza pabia parse-l ma nha irma sta dodu baridu. Txibita odja-l ta po rapazinhus dianti na rua. Txutxa debe sta dentu ta txiga pabia karu ki traze-l djuntu ku otus genti di Trindadi, ben desdi meiu dia. Es debe ter dexadu-el na Largu Ospital di Praia. Dja pasa 3 ora i tal i inda el ka txiga-nu kaza. Ti ki el dura si, normalmenti signifika ma kabesa sta-l mariadu di me disisu.
– Mariadu modi? Si ospital larga-l e pabia el sta dretu. – prutesta Txiku. Minis ki e salbaxi, ta xatia-l, i Txutxa, kabesa ka mutu prontu…
– Txutxa ta sta prontu lisin i, di un ora pa otu, el ta fika dodu baridu. I ten ora ki ti ki el perde kabesa, el ta sai ku dadji na algen. Si bu ka sta sienti pa difende, el e kapas di da-bu pankada. Nen mi ku nha mai, Txutxa ka sa ta popa mas gosi. I bedjisi sa ta konko na porta di nha mai kada bes ku mas forsa, enkuantu Txutxa sa ta fika kada bes mas forti, gosi ki dja el entra na vinti anu di idadi.
– Sin, bu irma sa ta bira uma mudjerona me. Nton, nhos txoma gentis di Trindadi pa ben buska-l. – Txiku akonselha se amigu Txeka.
– Es ka ta ben. Tantu mas ki gosi ki Txutxa sai di la. Dipos, nu ka sabe undi Txutxa sta i nen na ki stadu ki el sta: si el sta so xatiadu ku minis o si el sta diskonpesadu di me divera, sima gentis di Trindadi ta gosta di fla. Kes genti di Trindadi so ta ben ti ki nu fla-s ma Txutxa dja da algen pankada o sa ta da se propi kabesa pankada. Na kabesa di gentis di Trindadi, lugar apropriadu pa dodu kura e na meiu di se familia. So ki, alen di kes xuxinhu na rua ki ka ta dexa Txutxa en pas, nos ki e se familia, nu ka sabe lida ku el. Txutxa, ta bira si, el ta diskontrola i, ultimamenti, isu sa ta kontise mas manenti. Txutxa sta kada bes mas prigos, ki sa ta da-m medu dexa nha mai dentu kaza sozinhu ku el. Sima dja el dura ku txiga kaza, nu sta ku mas medu: el ta fika ta anda na rua, si el diskontrola, minis ta mete ku el i ta po-l inda mas dodu, xeiu di nervu. Propi, bu pode bai bo so pa kanpu pabia timenti N ka odja modi ki Txutxa sta, N ka ta sai di kaza.
Txiku, tristi pabia el sa ta ba kanpu sen se amigu di petu, ben pa porta pa sai. Na ta sai, el da ku Txutxa la baxu na rua, frenti skada di asesu pa apartamentu undi el Txiku sta. Txutxa staba ku ar di algen dodu baridu – kabelu tudu farfanhadu, bluza suju, saia ratxadu, kanelas rusu, sapatu so na un pe, i ku 1 padas di tubu di agu na mon. Tubu tenba grosura di un astia, ku kuazi un metru di konprimentu. Tubu staba ku un tornera bedju na ponta. Txutxa staba xeiu di raiba, ta koba fedi i rixu, ki tudu algen na roda ta obi. El sa ta kobaba un monti di nbretxinbretxis ki sa ta benba se tras, ta grita un pregu bai:
– Libra! Libra! Ale doda ta dadji!
Txutxa fika sakedu frenti skada di asesu pa apartamentu di mai di Txeka. El staba ta amiasa kes mosinhu ku se tubu un bes bai. Ti ki rapazinhus txiga pertu del, Txutxa ta ramete nes pa da-s ku tornera na kabesa, mas kes diabinhu era rapidu sima moska. Txiku fika ka sabe si el ta fika dentu apartamentu o ta tenta dixi. Si el dixi, Txutxa pode da-l ku kel tornera riba txada kabesa. Medu kumesa da-l kantu el fika ta imajina:
– Mas, si minina sai ku txabeta-m kel tornera la na mulera? N ten ki sai nel. Ago, N ka kre da-l pankada tanbe. Modi ki N ta ben da-l pankada dianti di se irmon ku se mai? Dja N fronta propi!
Txeka da fe ma se amigu Txiku sta ku medu:
– Odja li Txiku, ba fika na nha kuartu, bu fitxa porta na txabi. Ti ki N mansa fera, N ta po-l na se kuartu, N ta aviza-bu, bu ta sai numa forsa, bu ta ba kanpu.
So ki konselhu di Txeka ben tardi di mas. Na kel mumentu, Txutxa sa ta entraba na apartamentu. El entra ku odju dretu Txiku, ta nfanhi-l sima ki Txiku dja faze-l algun runhesa, enbora Txiku nen ka flaba-el inda un palavra siker. Na verdadi, ultimamenti, Txutxa sa ta odiaba Txiku kada bes mas pabia Txutxa da konta ma Txiku sa ta ivitaba-el kada bes di forma mas ostensivu: asves ti ki Txiku txigaba apartamentu di Txutxa i atxa Txutxa el so dentu apartamentu, Txiku nen ka ta xintaba pa konta partis sima el ta fazeba antis. El ta inventa un diskulpa i da milha imidiatamenti. Di manera ki Txutxa sa ta djobeba pa Txiku ku rostu runhu, ta djobe, ta ñuli, ku jetu di algen ki sa ta fla dentu del:
– Oji, bu ka ta skapa-m! Oji, N ta rabenta-bu kabesa ku es tornera li!
Txutxa avansa pa Txiku ku pasus firmi, mas divagar. Sima Txutxa ba ta txiga mas pertu di Txiku, asi ki el Txutxa fika ta pega se tubu kada bes ku mas jenika. Txiku bira soris ta baza. Kantu Txutxa kumesa ta labanta tornera, Txiku fla dentu del:
– Txiku ataka ku tudu forsa, faxi faxi, antis di Txutxa mata-bu!
Sima Txiku pensa, e si ki el faze: rapidu sima gatu, Txiku bua na Txutxa ti Txutxa ba da kosta na paredi. Mas, Txutxa era rapidu tanbe i forti sima boi: Txutxa, pa tenta ganha spasu pa da ku tornera, futi di brasus di Txiku, da uns pasu pa tras. Txiku ka perde tenpu: el salta na Txutxa otu bes ku tudu forsa, ki minina baza na txon, larga tubu. Txiku pega tubu i da rostu pa rua fumu ta baza.
*Marsianu nha Ida padri Nikulau Ferera
Publicada na edição semanal do jornal A NAÇÃO, nº 772, de 16 de Junho de 2022
