Por: Marciano Moreira*
Nu ben konta partis
Un bes, tenba un mos trosentu. Se nominhu era Ze Txitxarinhu.
Na bairu di Ze Txitxarinhu, tenba un segu ku obidu apuradisimu – el ta obiba kuzas ki pesoas normal ka ta obiba. Es segu txomaba Txuntxun Segu. Txuntxun gostaba di pidi kumida – so el xinti-bu ta kume, el ta pidi pa bu da-l un padas o un bokadu.
Na mesmu bairu, tenba un mos tolobasku ki ka ta skovaba denti. El ta txomada Txiku Bafu Fedi.
Kel dia, Ze Txitxarinhu konbina ku Txiku Bafu Fedi pa es ba prega Txuntxun Segu partida.
Ze Txitxarinhu pasa djuntu di Txuntxun ta kume toresma. Ze Txitxarinhu fla Txuntxun mantenha. Kel ora, Txuntxun pidi padas di toresma:
– N ka sa ta kume nada. – riaji Ze Txitxarinhu.
– Ze, bu sa ta konta ka-si! Falmadu! Ben abri boka lisin, pa N xinti! – prutesta Txuntxun ta ponta dedu pa se naris.
Sima staba konbinadu, mudu mudu, na nves di Ze Txitxarinhu abri boka, Txiku Bafu Fedi abri se bokona:
– Nffff! Mos, ba laba boka! – riaji Txuntxun Segu.
Un dia, Ze Txitxarinhu sa ta pasaba djuntu di un salon, el rapara ma tenba badju la. Kantu el purgunta porteru si el pode paga pa entra, porteru fla-l ma, na kel badju, ta entraba so algen kareka. Na ta papia ku porteru, Ze Txitxarinhu nota ma porteru era segu – porteru ta koreba mo na kabesa di tudu algen ki sa ta entraba pa sertifika ma era un kareka, pa el porteru pode dexa kel algen entra.
Nton, Ze Txitxarinhu sai ku un sperteza. El ba djobe un amigu. El ben li na porta badju, el dixi kalsa, el deta di bariga riba kabesa se amigu, pa es ba tenta kanba na sala badju.
Na ta pasa, porteru kore mo, da ku 2 mama kadera di Ze Txitxarinhu, pensa era 2 kareka ki sa ta entra kangadu. Nton, porteru fla:
– 2 di un bes, nau! Debe entra 1 di kada bes!
Otu dia, Ze Txitxarinhu sa ta pasaba nun lugar, el atxa 2 segu xintadu ta pidi zimola. El fla rixu:
– Ali 1 kontu pa nhos parti nhos 2.
Mas, Ze Txitxarinhu ka da ninhun di kes 2 segu dinheru.
Kes 2 segu era amigu kunpanheru i 2 kunpadri, Txiku ku Txontxon. Es ta xintaba senpri na kel lugar pa pidi zimola.
Txiga ora di ba kaza, tudu 2 segu fika kaladu ta spera pa kel otu da-l se 500$00. Mas, ningen ka sa ta daba kel otu se 500$00.
Kes 2 segu kumesa ta fika fadigadu. Pasa ora di ba kaza. Un bokadu, un di kes 2 segu dizanima, fla kel otu:
– Kunpadri Txiku, nhu da-m nha 500$00, pamodi dja txiga ora N ba diskansa osu.
– Da-nho 500$00?! Ah kunpadri Txontxon, nhu dexa di brinkadera, nhu da-m nha 500$00! Presa dja da-m di ba kaza!
Enfin, Txiku ku Txontxon fika ta diskuti ku kunpanheru, ti ki un tranziunti kaba pa konvense-s ma algun abuzadu ngana-s.
Un dia, Ze Txitxarinhu staba sakedu frenti atual Reitoria di Universidadi di Kabu Verdi. Ben ta pasa un omi nun autumovel bodona. El para pa purgunta Ze Txitxarinhu undi ta fika Ospital:
– Ospital ta fika la baxu, na fin di es rua li, na bu skerda. – risponde Ze Txitxarinhu, ta ponta dedu pa sul, na direson di Kuartel.
Pa kenha ki ka konxe Plateau (bairu sentral i storiku di kapital kabuverdianu), si bu sta frenti Reitoria, Ospital ta fika-bu pa Nasenti. Ka pa sul, nau.
Ze Txitxarinhu arma nsoda frenti di Reitoria.
Un bokadu, es mesmu omi ki purguntaba pa Ospital, torna para karu frenti Reitoria. Forasteru sai di karu. Era uma omon! El pega Ze Txitxarinhu na petu kanburzina, el leba-l ku pe fora txon pa npena norti di Reitoria, el labanta Ze pa atinji se altura, el ngosta-l na paredi, el da-l 2 bafatada, kada un na un banda kexada. Dipos, forasteru purgunta Ze Txitxarinhu:
– Stipor, undi ta fika Ospital?
Di es bes, Ze Txitxarinhu ponta dedu na direson izatu.
Forasteru fora-l mas 2 bafatada pa “ali bu bai”, timenti sa ta flaba-el:
– An, dja bu lenbra?! Toma gratifikason!
Marsianu nha Ida padri Nikulau Ferera
Publicada na edição semanal do jornal A NAÇÃO, nº 692, de 03 de Dezembro de 2020
