Home » Opinião » Nu ben konta partis: Uaaa!!! Odja uma asidenti!!!

Nu ben konta partis: Uaaa!!! Odja uma asidenti!!!

N ta prifiri troka un mudjer di 40 ku 2 di 20!

Por: Marciano Moreira

Na prinsipiu di dekada di 70 di sekulu XX, Txontxon ben di stranjeru. Txontxon era emigranti dja tenba un monti di anu. El riforma i el volta pa tera xeiu di dinheru. Omi dja staba ku mas di 60 anu na korpu, mas inda el staba rixu. Bazofaria ben ti nel para.

Mas, bazofaria, Txontxon ka panha-l dipos di ba stranjeru, nau. Antis di el baba stranjeru, dja omi era bazofu.

Alias, trokadu bazofaria misturadu ku sperteza i boka sabi e ki Txontxon konsigi ba Merka. Pamodi? Pabia, na kel tenpu ki Txontxon sai ku ba Merka, ta izistiba un lei ma so kenha ki sabe skrebe, podeba ba Merka. So ki Txontxon diskubri es norma dipos di el entra na ripartison undi ta dada autorizason pa ba Merka:

-Pa nu da-nho autorizason, nhu ten ki skrebe nomi di-nho lisin.

-Agora que a porca torceu o rabo! – riaji Txontxon xeiu di bazofaria – ta subi onbru, mete mo na bolsu, da di banda –, enbora omi ka sabeba po nen O ki buru ta po na tera bufabufa.

-Ah! Dja nhu sta autorizadu. Nho nhu ta papia purtuges rei di ben. Isu signifika ma nhu sabe skrebe. Nhu ali papel –riaji funsionariu merkanu.

Txontxon ben di Merka na avion djuntu ku se amigu Denda – un otu bazofu. Duranti vouu, sirbidu kafe. Kafe staba rei di kenti. Denda kumesa bebe kafe primeru. Denda fika lagua ta baza:

-Mas, Denda, pamodi bu sa ta txora? – Txontxon purgunta.

Denda, sienti ma se kunpanheru di viaji era rei di bazofu, rizolve konta ka-si pa odja modi ki Txontxon ta riaji dipos di el Txontxon da golpi di kafe kenti tanbe:

-E sodadi di familia, Txontxon! Sodadi ta due! – Denda risponde ku kara seriu.

Txontxon, distraidamenti, da un golpi di kafe kenti tanbe. Lagua bira ta baza-l tanbe. Txontxon, ki tanbe ka kreba konfesa verdadi trokadu bazofaria, sklarese:

-Denda, bu ten razon – sodadi di familia ta due txeu di mas!

Kantu Txontxon volta pa tera, el konstrui un sobradu i sai ku kaza ku un minina ki podeba ser se neta. Na prinsipiu di namoru, se irmon, Txeka, tenta tra-l seka di kel minina noba:

-Manu, abo dja bu sta di idadi. Pamodi bu ka ta ranja un mudjer madura pa bu kaza ku el? Djobe un mudjer di uns 40 i tal anu na poku na poku!

-Mas, Txeka, ami N ta prifiri troka un mudjer di 40 ku 2 di 20! – Txontxon fika ta brinka.

-Dexa di brinkadera! Bu ka pode nen ku 1 di 40 kifari ku 2 di 20!

– Bu sta nganadu, manu Txeka! Ami inda N ta pila kana sima un djaki!

-Sin, sima djaki. Ba kaza ku es txubara rapikada, bu ta fika sima djaki me – xeiu di txifri…

-Txeka, na tera di undi N ben, ta fladu ma e prifirivel bu dividi un bon bolu ku otu di ki kume farelu bo so…

-Npos, bu juis bu oredja! – Txeka bota tuadja.

Txontxon kaba pa kaza me ku kel minininha. Pa rapariginha ka fika nfastiada dentu kaza, Txontxon fika ta da txeu festa i ta organiza txeu pikiniki. Trokadu bazofaria, Txontxon bira ta kolega so ku gentis inpurtanti.

Ses konvidadu ka ta fadjaba nen festas nen pikinikis, trokadu 2 razon: primeru, kumida ku bibida era so kes di midjor kualidadi, avontadi i na fabal; sigundu, mudjer di Txontxon gostaba di dansa kes dansa sensual, ki ta dexaba omis konvidadu ta baba.

Na un di kes pikiniki, kunpanherus di Txontxon, nun sertu mumentu, rizolve le jornal. Tudu es sa ta leba jornal na kel mumentu. Nton, Txontxon, pa ka fika pa tras, rizolve kumesa finji ma el sa ta leba jornal tanbe, ta munhimunhi boka, mas el ka sabeba le.

Ta kontise ki kel dia Txontxon staba ku poku sorti: el pega jornal kabesa pa baxu. Mas, pabia el ka sabeba le, el ka da konta. Na ta folia jornal, Txontxon txiga na un pajina di jornal ki tenba un autumovel. Sima Txontxon odja kel autumovel ku rodas pa riba, e si ki Txontxon grita:

-Uaaa!!! Odja uma asidenti!!!

*Marsianu nha Ida padri Nikulau Ferera

PartilheTweet about this on TwitterShare on FacebookShare on Google+Email this to someone

Comentário

Publicidade