Por: Marciano Moreira*

Banda 6 ora tardi di un veron kenti di 2009, un minininha di ses 12 anu di idadi entra na se kaza numa forsa. El ba dretu biblioteka undi se pai staba xintadu ta le:

-Papa, kuze ki e katxas?

-Katxas e porku matxu ki ta tenedu pa monta porka. Mas, nha fidju femia, pamodi bu sa ta purgunta-m signifikadu di es palavra ki kuazi ka ta uzadu li nes lar?!

-Ze di Txeka fla-m ma se pai fla-l ma oji el konxe bu katxas!

-Nha katxas!?

-Pai di Ze debeba sta na xuxadera, pabia signifikadu ki bu da-m ka ta konjuga…

-Eh! Bo, bu ka sabe ma Txeka e xuxanti?! Ago, nha katxas… Spera N odja si N ka sta eradu sobri signifikadu di katxas. – omi, di uns 50 anu di idadi, katrisa pa labanta se korpu pizadu, ba na stanti di livrus, panha un disionariu, abri, komesa buska palavra katxas.

-Bu sa ta odja!? N ten razon! Napoleão Fernandes, nes se disionariu li intituladu “Léxico do Dialecto Crioulo do Arquipélago de Cabo Verde”, ta fla kel li sobri palavra katxas: el e un palavra agudu [= katxás]; el ta uzadu na Sotaventu; el ten, fora kel signifikadu ki N da-bu, kes signifikadu li: inpureza ki ta tradu na faze mel o asukar (es inpureza – ki konxedu, na Santiagu, inda pa txoko – ta dadu porku o ta uzadu pa fermenta kalda-l grogu); kel parti tras di piskos.

-Si kadjar es Napoleão skese algun otu signifikadu – N sa ta kontinua sen ntende kuze ki kes signifikadu la ten a ver ku kel omi na jornal ki Txeka fla ma e bu katxas.

-Omi na jornal!? Spera… Manba dja es publika kel nha replika? An! Bu ten razon! Palavra katxas ta enpregadu tanbe pa dezigna, ku sentidu figuradu, pesoa ki ta toma konta pa bo nun briga ki bu ten burgonha di briga.

-Ago dja N ntende… I pamodi bu ta xinti burgonha briga kel briga di jornal?

-Pabia N ka ten razon. N ba mete biku na aria ki N ka ta ntende, parse un mos matxikadu ta diskubri-m kareka sen papa na lingua.

-Ze fla-m ma se pai fla-l ma nunka el odjaba un Doutoradu ta faze un papel ton indignu sima kel. Ma un Kabuverdianu ka al setaba faze kel papel nunka.

-Eh! Fidju femia, e pur isu ki bu ka konxeba palavra katxas. Li na Kabu Verdi, ten poku katxas, pabia nos e un Povu orgulhozu!

-Nton, pamodi kel omi di nomi galanti seta faze-bu es trabadju suju li?

-Pabia el e quinta essentia di katxas!

-Ale-bu, papa, ku bus latin! Quinta essentia?!

-E midjor bu ba ta prende palavras i spresons di latin. Ti ki bu oponenti roka-bu, bu ta da-l ku latin, el ta taranta, bu ta safa. Alias, N uza es stratejia li na kel replika ki es tal katxas sina pa mi.

-Sina pa bo!? Si el e spesialista, pamodi ki el ka skrebe replika, el me?!

-El ka sabe dretu nen purtuges kifari le es lingua di kalikaka ki nos ex-skravus kre ofisializa. E nesesariu kontinua ta obriga es Pretus uza purtuges entri es pa, nos ki ten purtuges komu lingua maternu, nu kontinua ta dispreza-s ti ki es da baraka i, asin, pa nu kontinua ta dadu postu mas altu ki es! N ta inventa defetu pa po na tudu kuza ki Stadu faze pa labanta ses linguajar. I pa N konfundi-s, N ta finji ma N ta difende ofisializason di kriolu…

-Papa, dja bu ripiti-m es bu tioria ti dja el ndoga-m. Alias, trokadu es tioria, bu ta kastiga-nu ti ki nu papia kriolu li na kaza. Ka bu divaga – kuze ki e quinta essentia?

-Na latin ki izisti es spreson – quinta essentia. Es spreson ben di gregu antigu. Gregus ta uzaba-el pa dezigna korpu di Deus – un materia perfeitu. Kes otu 4 materia perfeitu di universu, sigundu kes sabiu di antigamenti, era: tera, agu, ar i fogu.

-Mas, es materia perfeitu e di kuze, propi?

-Bon purgunta! Es filozofus staba konvensedu ma Deus ta izisti, i pa El izisti, El tenba ki ser materia. Nton, es sabius sai ku es tioria: un materia ton perfeitu, ton perfeitu ki es propi, provavelmenti, ka tenba kapasidadi di splika dretu e kuze.

-Si quinta essentia e korpu di Deus, pamodi ki bu ta ben asosia-l ku un katxas, ku algu repugnanti?

-Ora, signifikadu di es spreson ivului ku tenpu. Oji en dia, ti ki bu fla, pa izenplu, quinta essentia di katxas, bu sa ta fla ma es nha testa-di-feru ta reprezenta un katxas paradigmatiku, un katxas perfeitu. Tudu algen ki sabe ma mi e se xefi, dipos di le kel replika sen pe nen kabesa, ta sklama:

-Mas, kuze ki es stranjeru ten a ver ku nos lingua pa el ben entra nes briga?! Es mos so pode ser un katxas!

-Diaxi, nho! Papa, bo e ka mansu. Bu ta suja, bu ta obriga es koitadu ba linpa. Pur isu ki, na fotu, el tene un surizu di algen sen dignidadi. Oji dja N fika ta sabe modi ki e kara di un quinta essentia di katxas!

Sapatinha ribera riba, sapatinha ribera baxu, tudu semelhansa e quinta essentia di koinsidensia!

*Marsianu nha Ida padri Nikulau Ferera

Partilhe