Home » Opinião » Midalha di meritu kultural 1º grau

Midalha di meritu kultural 1º grau

Se kauza maior – lingua kabuverdianu –, dibatis, pedagojia, amor pa invistigason, ses livru i forti konvikson na tudu es perkursu – es foi justifikasons di Guvernu

Marciano Moreira

Trokadu “se kauza maior – lingua kabuverdianu –, dibatis, pedagojia, amor pa invistigason, ses livru i forti konvikson na tudu es perkursu” – es foi justifikasons di Guvernu pa atribui linguista, skritor i ex-Ministru di Kultura Profesor Dotor Manuel Veiga es midalha di oru pa okazion di Komemorason di Dia Nasional di Kultura i Kumunidadis, 18-10-2017 (konferi diskursu di Ministru di Kultura, Dr. Abraão Vicente: https://tinyurl.com/y7ozos2x).

Patronu di Dia Nasional di Kultura i Kumunidadis e Eugénio Tavares, pioneru di skrita puetiku na nos lingua. Pur isu, es komemorason onra se patronu atribuindu kenha ki dja ten mas di 40 anu ta invistiga nos lingua, es galardon. Profesor Dotor Manuel Veiga dja kontribui sobrimanera pa nu pode skrebe nos lingua oji sientifikamenti!

Ifetivamenti, si Eugénio Tavares kontribui pa insufla nos lingua mel, Profesor Dotor Manuel Veiga kontribui pa insufla-l efikasia kumunikativu! I, na verdadi, lingua ten ki ser sabi i efikas. Sabi pa konkista nos kurason i efikas pa konkista nos menti. Puezia ku gramatika e prinsipal instrumentu pa atinji kes objetivu la!

Asves, nu ta ten difikuldadi na ntende kuze ki nos konpatriota skrebe na nos lingua. Pa nu ntende, nu ten ki deduzi kuze ki el kreba skrebe, rekorendu manenti a konhesimentu di otus lingua, pabia kel ki el skrebe, ka e lojiku. Pamodi? Pabia inda alguns Kabuverdianu ta skrebe a toa, sen rispeta plenamenti gramatika di nos lingua, ku prijuizu pa efikasia kumunikativu.

Persentajen di kes ki sa ta studa di es pa es pa insufla mas gramatika na ses skrita, sa ta aumenta. I es prusesu e un bola di nevi, mesmu peranti relativu pasividadi di Stadu. Patriotismu i emulason e mas forti ki kes forsa ki ta rizulta na skrita kualikuali…

Nos Konstituison ta fla: ma un di kes tarefa fundamental di Stadu e prezerva, valoriza i promove lingua maternu kabuverdianu (alinia i) di Artigu 7º); ma Stadu debe kria kondisons pa paridadi entri nos lingua ku purtuges (nº 2 di Artigu 9º); ma tudu sidadon nasional ten diver di sabe linguas ofisial i direitu di uza-s (nº 3 di Artigu 9º); i ma Stadu debe insentiva uzu di lingua kabuverdianu na kumunikason skritu (alinia f) di nº 3 di Artigu 79º).

Ku es galardon, menbrus di Guvernu di es IX Lijislatura sa ta faze ses juramentu di rispeta Konstituison jus. Menbrus di Guvernu, virgula: exseptu Ministra di Idukason, Maritza Rosabai, ki, na ta mata ensinu bilingi, rosa bai riba tudu es kumandus konstitusional.

Marsianu nha Ida padri Nikulau Ferera

PartilheTweet about this on TwitterShare on FacebookShare on Google+Email this to someone

Comentário

Publicidade