Home » Opinião » Provas di susesu di ensinu bilingi

Provas di susesu di ensinu bilingi

Si Kubana Maritza Rosabal (Ministra di Idukason) ba djunta kabesa ku Purtugeza Adriana Mendonça (Diretora Nasional di Idukason) pa kaba ku ensinu bilingi, es ta prijudika futuru di nos kriansas!

Marciano Moreira

Rezultadus di turmas di ensinu bilingi konparadu ku kes di turmas ki sigi rijimi tradisional di ensinu, ta prova susesu di ensinu bilingi!

Turmas bilingi di Txansinha, di Skola di Flamengu, ku di Skola di Ponta d’Agu, komesa ses kaminhada na anu letivu 2013/2014. Duranti es 4 anu letivu, senpri es aprizenta rezultadus mas altu ki ses kolegas di turmas regular di mesmus Skola i anu di skolaridadi.

Es 2 tabela (ilaboradu ku bazi na informason ki sta na pautas di avaliason) ta mostra rezultadus final di 3º periudu di anu letivu 2016/2017 di 4º anu di turmas bilingi ku di turmas regular pa nu pode konpara.

Na turma bilingi di Txansinha di Skola di Flamengu, alunus atinji 91% di susesu (nun universu di 11 alunu, pasa 10). Turma bilingi resebe, na anus letivu subsekuenti a kel di inisiu di speriensia bilingi, 5 alunu ripitenti, ki ka sta kontabilizadu djuntu ku alunus di turma bilingi, pabia es tevi un perkursu diferenti. Mas, si nu kre konta ku es tanbe, nivel di susesu ta baxa pa 87,5%, ki, mesmu asin, e un taxa di susesu mas altu ki di turma regular. Di kes 5 alunu ripitenti, so 1 ki riprova.

Na turma regular di Pedra Baru di Skola di Flamengu, taxa di susesu e di 71% (nun universu di 7 alunu, pasa 5).

Si nu konpara notas di alunus na kes disiplina prinsipal, nu ta rapara ma, na turma bilingi, alunus atinji media di 15,6 na purtuges, 14,7 na matimatika i 14,9 na siensias integradu, enkuantu ki, na turma regular, alunus atinji media di 12,8 na purtuges, 12,7 na matimatika i 12,1 na siensias integradu.

Na Skola di Ponta d’Agu, tenba 5 turma di 4º anu (1 bilingi i 4 regular). Turma bilingi aprizenta 100% di susesu, enkuantu ki kes 3 turma regular normal aprizenta serka di 82% di susesu i kel turma regular ku mas difikuldadi aprizenta 58% di susesu.

Si nu konpara notas di alunus na kes disiplina prinsipal, nu ta rapara ma, na turma bilingi, alunus atinji media di 16,1 na purtuges, 15,1 na matimatika i 16,1 na siensias integradu, enkuantu ki, entri turmas regular, medias mas altu e 13,4 na purtuges, 13,1 na matimatika i 13,7 na siensias integradu.

Kontra faktus, ka ten argumentu! Si Kubana Maritza Rosabal (Ministra di Idukason) ba djunta kabesa ku Purtugeza Adriana Mendonça (Diretora Nasional di Idukason) pa kaba ku ensinu bilingi, es ta prijudika futuru di nos kriansas!

Captura de ecrã 2017-09-12, às 10.18.53

Marsianu nha Ida padri Nikulau Ferera

PartilheTweet about this on TwitterShare on FacebookShare on Google+Email this to someone

Comentário

Publicidade