Home » Opinião » Nu ben konta partis: Ba diskubri mi e kenha!

Nu ben konta partis: Ba diskubri mi e kenha!

Nun zas, Txiku rabata se izami ki dja staba na mon di profesor, ba na kel pilha di izamis ki staba riba sekretaria, tufudja se izami na meiu, ladridja kel pilha di izamis, baradja-s, torna bira-s nun pilha riba sekretaria

Marciano Moreira*

Era un bes, tenba un alunu kabesa rixu. Se nomi era Txiku Puxin. Alunu abuzadu sima el ka tenba na Kabu Verdi interu. Un di ses trakinisi era xuxa ku profesor.

E asin ki, un dia, se profesor di purtuges purgunta, na un pontu, kal ki era personaji prinsipal di un pikenu kontu. Txiku (dipos di sertifika ma dja el rispondeba kes otu purgunta ku siguransa ki ta garantiba-el un rizultadu pozitivu) skrebe, sen tra nen po, es risposta na pontu:

-Mas, profesor, si nho nhu sabe kenha ki e personaji prinsipal, pamodi nhu sa ta purgunta-m?!

Un sertu dia, profesora di storia purgunta Txiku, oralmenti, kal kaminhu maritimu, Vasco da Gama sigi pa ba Índia? Txiku risponde, pa spantu di turma:

-Mas, profesora, ami N ka sabe dretu nen kal ki e kaminhu ki N debe sigi pa N txiga kaza di nha dona la Txuba Txobe, ago nha ta ben purgunta-m kal kaminhu es omi sigi dja ten un monti di sekulus pa ba un tera lonji sima Índia?! Eh nha, kantu el sigi es kaminhu, inda nen N ka naseba!

Mas, xuxadera ku mas piada kontise na se ultimu izami na liseu. Txiku dja staba na ultimu dia di ultimu anu di liseu. Txiga na turma, pa superviziona es izami, un profesor ki ka konxeba alunus di kel turma. Es profesor po kestionariu ladu skrebedu pa baxu frenti kada izaminandu i, na fin, fla alunus:

-Es izami di matimatika ta dura 2 ora izatu. Nes mumentu, sta 8 ora i 7 minutu. Purtantu, nhos ten ki ntrega izamis antis di 10 ora i 8 minutu, inpreterivelmenti. Nhos pode komesa. N ta dizeja-nhos txeu sorti!

Alunus komesa ses izami. Dipos di algun tenpu, es ba ta ntrega izamis. Ba ta ntrega ki, kantu txiga me 10 ora i 7 minutu, so Txiku ku profesor ki fikaba na sala – tudu kes otu alunu dja ntregaba ses izamis i dja baba ses kaminhu.

Profesor ruma izamis ki dja ntregada nun pilha riba sekretaria. El aviza ma dja sta na ora di ntrega izamis. Kantu pasa mas uns 3 minutu, el fla ma kel era ultimu avizu; ma, di kel mumentu mas 1 minutu, el ta komesa marka na izami “ntregadu dipos di ora”.

Profesor fika intrigadu ku kel alunu ki, na diskontra, sa ta kontinuaba ta faze se izami:

– Pamodi ki kel alunu la sa ta kontinua ta skrebe ku tudu kalma i ka sa ta ntrega izami?! – profesor fika ta purgunta se kabesa.

Pur fin, profesor anunsia ma el ta marka na izami di kel alunu: “ntregadu dipos di ora”.

Txiga un pontu, profesor labanta, komesa ruma kuzas pa abandona sala sen izami di kel alunu intriganti. So na kel instanti, kantu dja pasaba serka di 12 minutu dipos di limiti di tenpu, e ki Txiku kunsa labanta, ben ku se izami na mon, divagar, sen fadiga i longa profesor.

-N ta marka na bu izami “ntregadu 12 minutu dipos di tenpu limiti”! – riaji profesor.

– Mas, profesor, bu ka sabe ku kenha ki bu sa ta papia?! – purgunta Txiku, ta ñuli profesor manenti, sima si profesor era un inpustor.

-N ka sabe – nunka N raparaba-bo nes liseu.

-Bu ten serteza ma bu ka konxe-m? – insisti Txiku, inda ku se ar altivu.

– Serteza absolutu! – riafirma profesor, dja un poku xatiadu ku kel ar insulenti di kel alunu dizaforadu.

Nun zas, Txiku rabata se izami ki dja staba na mon di profesor, ba na kel pilha di izamis ki staba riba sekretaria, tufudja se izami na meiu, ladridja kel pilha di izamis, baradja-s, torna bira-s nun pilha riba sekretaria, da rinkada faxi pa rua i, na porta di sala, fla profesor (ki staba inda spantadu, boka abertu) ku vos firmi i rostu nfanhidu:

-Ba diskubri mi e kenha!

*Marsianu nha Ida Padri Nikulau Ferera

PartilheTweet about this on TwitterShare on FacebookShare on Google+Email this to someone

Comentário

Notícias Relacionadas

Classificados